Tuikum bialtu MLA in Chalphai Leilet a tlawh
Tuikum bialtu MLA leh Minister Er. Lalrinawma chuan a bial chhung Lungpho khaw ram Chalphai leilet hmun chu niminpiah khan tlawhin leilet neitute nena inkawmna neiin hmasawn zel dan tur an sawiho.
Chalphai leilet hmun a tlawhna ah hian Minister Er. Lalrinawma chuan intodelh tura hma lam kan pan zel a tul avangin mitinin mahni zawna eizawnna hna kan thawhte kan beih sauh sauh zel a ngai tih sawiin, tih takzet a kan thawh chuan kan thawnrim rah hi kan seng zel thin a ni, a ti a. Chalphai leilet neitute pawhin an hnathawhna hmun ngei a tlawh a, an harsatna rawn hmuhpuitu Minister an nei chu lawmawm an tih thu Er. Lalrinawma hi lo hrilhin, an phurin an hlim hle tih an lo hrilh bawk a ni.
He hunah hian Minister hi Serchhip DAO Tlangtimawia Zote chuan taiawmin DAO leh a thawhpui te hian Chalphai leilet-a Thlasik thlai chin dan tur leh a enkawl dan chi hrang hrangte zirtirna hun an buatsaih nghal a. Ngentiang khuaa Fu chingte Fu huan pawh an enpui nghal a ni.
Tuikum bialtu MLA ni bawk Minister Er.Lalrinawma hian niminpiah vek khan Tuikum bial chhung khaw dang, Ngentiang, Lungpho leh Rullam khua te thlawh kual nghalin, khawtlang mamawh leh hmasawnna tur atana hmachhawp hrang hrangte VC leh NGO thenkhat te nen an sawiho bawk a ni.
Comments
Post a Comment