Camp Victoria beihna ah mi 5 an thi

Niminpiah tlai lama Myanmar indo thlawhna te’n bomb hmanga Chin National Army (CNA) hmunpui ‘Camp Victoria’ an beihna ah mi 5 an thi.

Farkawn leh Vaphai khawtlang hruaitu sawi danin Myanmar sipai indo thlawhnate hian Farkawn khua atanga hnai te, Tiau lui kama awm Camp Victoria ah hian vawi 5 vel bomb an thlak a. CNA hmunpui a an hotu pakhat sawi danin thite hi mipa pathum leh hmeichhia pahnih an ni a. Mipa thite hi Salai Van Ro Piang, Salai Duh Tin leh Salai Kil Mang te an ni a, hmeichhe thite hi Mai Ngun Hlei Par, Mai Sui Len Par te niin an awmna Barrack chhung takah bomb a tlak avanga thi an ni a. CNA mi vek an ni a, training mek People’s Defence Force an tih mai, mipui sipaite erawh chu an him ni a thudawn a ni. Bomb thlak avang hian hliam an awm nia thudawn niin Camp Victoria chhunga an damdawi In-a enkawl lai mi 20 vel erawh chu bomb hmanga beih an nih hnu hian chhuahtirin an khaw lam theuhah an haw a, an zinga damlo pakhat erawh chu a nat deuh avangin Aizawl lama enkawl tura lak a ni.

Niminpiah-a Myanmar sipai indo thlawhna-in bomb a thlak khan India ram chhung chin, Tiau lui atanga India lam meter 30 velah bomb pakhat chu a tla a. Camp Victoria an beihnaah hian India ram chin vansang an rawn lut niin an sawi bawk a. Farkawn khua a Truck pakhat chu a darthlalang a keh chhe hle bawk a ni.

Tarlan tawh angin Camp Victoria hi Chin National Army (CNA) te hmunpui a ni a, Myanmar ramchhunga tualchhung buaina a thlen hnu ah tualchhung mi silai kenga Myanmar sipai sawrkar do tura inpe engmawzatin in training-na atan an hman avangin Myanmar sipai sawrkar hian a ngaimawhna a rei tawh hle ni a thudawn a ni a. Myanmar sipai-in an beih mai lohna turin Camp Victoria luhka zawng zawng hi an tiping vek tawh a, hei vang hian indo thlawhna hmang hian a bei ta niin a lang.