Branch YMA Kunpuan hawng

Ngentiang Branch YMA chuan nimin khan an Branch YMA Kumpuan ‘Khawtlang nun chawisan’ hawnna hun hmangin he hun hi bialtu MLA leh AH&Vety Minister Er. Lalrinawma chuan khuallian niin a hmanpui a ni.
    Ngentiang Community Hall-a he hun hmanna ah hian bialtu MLA chuan Ngentiang Branch YMA in anmahni puala Kumpuan tha tak an nei chu lawmawm a tih thu sawiin, YMA chu pawl lian leh thianghlim, hnamdang te pawhin an hriat lar a nih thu a sawi a, khawtlang inrelbawlna ah pawh dinhmun pawimawh tak luahtu a nih thu a sawi bawk.

Khawtlang nun chawisanna kawngah thil pawimawh ber pakhat chu mitinte nungchang thatna a ni tih theih a nih thu Minister Er. Lalrinawma chuan sawiin, Khua leh tui tha ni tura inpekna, vantlang thilte mahni ta ang taka enkawl thiamna te, nungcha leh ramngaw humhalh that te, Zonunzemawi tinreng rinawmna, tlawmngaihna, leh aia upa zahnate chawinung thiam zelna te a pawimawh hle dawn tih a sawi a. Kan hnam ziarang leh tawngte chu khawiahmah zahpui lova, a chawi lartu nih zel zawk te a that thu a sawi bawk.

Zirna leh hriselna chu hmasawnna bulthut a ni tih kan hriatreng a pawimawh thu pawh sawiin, taksa hrisel tak kan neih theih nan, nunkawng thianghlim kan zawh thiam a tul thu leh ram, chhungkua leh khawtlang tana thawk-chhuaktu kan nih theih nan zirna leh hriatna lama kan intahhriam sauh sauh pawh a pawimawh thu te pawh a sawi bawk.

Ngentiang Branch YMA President Lalbiakmawia kaihhruai he hunah hian ‘Khawtlang nun chawisan leh zirna’ tih leh ‘Khawtlang nun chawisan leh eizawnna’ tih thupui hmangin thusawi ngaihthlak a ni bawk.