Mizoram-ah Missionary Day vawi 129-na hmang; Kohhran te Missionary tirhchhuah 3479 awm
Kum 1894 January 11 khan Welsh Missionary pahnih Pu Buanga (Rev J.H. Lorrain) leh Sap Upa (Rev F.W. Savidge) te chuan chanchintha hril turin Mizoram (Sairang) an rawn lut a, Isua Krista Chanchin tha hrilin Kohhran an din bakah, A AW B siamin, zirna sikul an din a, Mizoram an lo chuanchhuah ni hriatreng nan hian kumtin January11 hi Missionary Day atan hman thin niin Mizoram Sawrkar chuan Missionary Day hi Sawrkar chawlh (State Holiday) atan kum 1989 atang khan a puang a ni. Baptist Church of Mizoram (BCM) leh Salvation Army te chuan he ni hi chanchintha thlenni atan hmangin BCM Kohhran tam zawk chuan Chanchintha thlen avanga lawmthu sawi inkhawm an buatsaih a, Thupui atan ‘Chanchintha hi hril rawh u’ (Marka 16:4) chu hman niin Kohhran thenkhat chuan ruai nen he ni hi an hmang a, Serchhip-a BCM Kohhran tam zawk chuan ruai nen he ni hi an hmang a ni.
.jpeg)
Presbyterian Kohhran chuan Pu Buanga leh Sap Upa ten Mizoram an rawn thlen ni hi chanchintha meimit lova tihnun tanni ah pawmin, an Kohhran din tanni atan he ni hi an hmang a. Presbyterian Kohhran thenkhat chuan inkhawm urhsun an buatsaih a, Sap Upa leh Pu Buanga te awmna thin leh kum 1896-a Mizorama Kristian biak In hmasa ber an dinna hmun, Aizawl Zarkawt Mac Donald Hill-a Pioneer Missionary-te hriatrengna lungdawhah nimin zing khan Inkhawm buatsaih a ni bawk.
‘Mizoram Statistical Abstract 2021’ in a tarlan danin kum 2020-2021 a Mizoram a Kohhran lian ten Missionary an tirhchhuah chu mi 3479 an ni a. Presbyterian Church of India (PCI) in Missionary 1553 tirchhuakin an tirchhuak tam ber a, Baptist Church of Mizoram (BCM) in 946, UPC (NEI) in 219, UPC (Mizoram) in 138, Salvation Army in 307, Seventh Day Adventist in 15, Evangelical Church of Maraland (ECM) in 104, Lairam Isua Krista Baptist Kohhran (LIKBK) in 175 leh Isua Krista Kohhran (IKK) ten 22 an tirchhuak bawk a ni.
Comments
Post a Comment