MRB in Banking Transaction Rights Facility hawng

Mizoram Rural Bank (MRB) chuan Internet kaltlanga Account khawih chetna tur Internet Banking Transaction rights facility an nei thar a, tunkar Thawhtanni khan a hawnna neih a ni.

MRB Internet Banking Transaction rights facility hi SBI Corporate Center, Mumbai-a General Manager (RRB) V. Siva Kumar chuan Aizawl-a MRB Auditorium-ah hawngin MRB hmasawnna ropui a tih thu leh Internet Banking Transaction Facility an nei ta chu a lawmpui thu a sawi a, hmasawn zel turin duhsakna a hlan bawk.

He hun hi MRB General Manager Samuel L Warbah chuan kaihruaiin MRB Chairman V. Jaya Chandra chuan MRB dinhmun leh hmalakna te report a pe a, MRB chu Mizoram chhunga Bank awm te zingah Branch ngah ber a nih mai bakah Bank awm lohna khua thingtlang kilkhawr ber thleng pawhin Customer Service Point za chuang hmangin mipui rawng an bawl mek thu a sawi a, Bank thang chak ber te zinga mi a nih thu leh anmahni dawrtute tan IT lamah pawh theihtawpa hma an lak thu a sawi bawk.

He hunah hian Mizoram Rural Bank hian Mizoram sawrkar hnuaia Information & Communication Technology Department hnenah Free Public Wifi dinna turin Wifi Router 500 hlanna an nei nghal a, Mizoram sawrkar aiawhin Dr. Lalthlamuana, Chief Informatics Officer, Deptt. of ICT in thilpek hi dawngin ICT Department in BharatNet hnuaia a hmalakna pakhat, thingtlang khaw 500 te tan a thlawna Wifi pekna turin VSAT bun a nih tawh thu leh, mipui hman tangkai tak tak theih tur chuan Wifi Router mamawh a nih thu leh hemi atana Mizoram Rural Bank in Wifi Router an lo thawh ve chu lawmawm a tih thu a sawi a, Digital Transaction lama MRB hmalakna ah an theih ang apianga lo puih ve an inhuam thu a sawi bawk.