Minister leh sawrkar mi pawimawh ten Bangladesh atanga raltlan te dinhmun an enfiah

Bangladesh ramchhung buaina avanga Zohnahthlak (Bawm) Mizoram lama sahimna zawnga rawn tlanlut te dinhmun chu nimin khan sawrkar aiawhin Minister ten enfiahin Parva-III an tlawh a, raltlante tan a rang thei anga ruahmanna siam zel a nih tur thu an sawi.

Chief Minister Zoramthanga ruahmanna in nimin khan  I&PR Minister Lalruatkima, Transport Minister TJ. Lalnuntluanga leh Commerce & Industries Development Board ViceChairman K. Laldawngliana MLA bakah MP leh MLA lo ni tawh Vanlalzawma te chuan Parva-III hi tlawhin Bangladesh ram chhung buaina avanga Zohnahthlak (Bawm) Mizoram lama sahimna zawnga rawn tlanlut te dinhmun leh an mamawhte a tul angin an enfiah a, raltlante tan thilpek sumfai leh a bungrua te hlanin raltlante (refugee) awm lailawkna hmun tlawhin Parva-III ah hian vantlang inkhawm an nei a. Raltlante chu harsatna awm apiang khawtlang hruaitute leh NGO te hrilh hre zel tur leh a tul dan anga SDO (Civil) Chawngte hnenah pawh an harsatna leh an mamawh thlen zel turin an chah bawk. He hunah hian raltlante tana hmalakna kal mek tui khawlna PHE lamin an buatsaih leh thil tul dangte pawh en nghal a ni a, Sawrkar aiawha awm Official hrang hrang te nen inkawmna hun an hmang bawk a ni.

Heng sawrkar mi pawimawh te hi khawtlang hruaitute nen pawh inkawmin hmalak zel dan tur an sawiho a, an mamawh an lo sawi te pawh a tul anga sawrkarin a ngaihtuah zel tur thu an sawi bawk a ni. Sawrkar aiawha kal Minister te va kal hian an thil hmuh dan leh a tul angte chu Aizawl lama sawrkar hotute, a bik takin Chief Minister pawh an sawipui tur thu leh ruahmanna a rang thei ang bera rawn siam zel a nih tur thu an sawi bawk a, raltlan te pawh mahni Inpui an thleng tih hria a thlamuang taka awm tura an duh thu an sawi bawk a ni.

Parva-III tlawha zin heng Minister leh sawrkar mi pawimawh hi Lawngtlai DC ruahman angin Chawngte-a SDO (Civil) leh SDPO ten an lo dawngsawng a ni.