A thlawnin buhfai sem dawn

Sawrkar laipui ruahman angin National Food Security Act, 2013, Section 3 hnuaia beneficiary-te tan a thlawna buhfai sem tan a ni dawn.

Tunkar Thawhtanni khan Mizoram sawrkara Food, Civil Supplies & Consumer Affairs Director Dr. Andrew Vanlalauva’n Mizoram District hrang hranga DCSO-te hnenah a thlawna NFSA ration buhfai sem chungchang chu hriattir in, sawrkar laipuia Ministry of Consumer Affairs, Food & Public Distribution-in December 30, 2022-a notification a tihchhuah angin NFSA 2013 Section 3 hnuaia beneficiary (AAY leh PHH)-te tan ration buhfai a thlawna sem tawh tur a ni a, AAY chhungkaw tan Card khat ah kg. 35 zel leh PHH beneficiary-te tan member pakhatah kg. 5 zela sem tur a ni ang.

Supply Department Director chuan DCSO tinte chu an huamchhunga Fair Price Shop tinah NFSA Ration chu a thlawna sem tawh tur a nih thu hriattirin, man neia an lo sem lohna turin a concern VC/LC-te hriattira thawh-puiin, Centre Incharge-te pawhin uluk taka vil turin a ti a. Ration chu online-a sem chhunzawm tur niin, e-PoS leh Digital Weighing Scale an hmang ngei tur a ni a, central sawrkar duh dan angin ration la te hnenah e-PoS Print, Receipt an pechhuak ngei tur a ni, a ti bawk.