Lenkawl

Mizoram Legislative Assembly Session chu nimin khan Aizawl-a Assembly House-ah neih \an a nia. MNF chuan Affidavit diklo hmangtu Chief Minister, Lal Thanhawla chu Assembly House-a \hu tlakah an ngaihloh thu sawiin, Chief Minister in Assembly House a pan tur chu an lo dang a. Hei hi Congress chuan mawilo an tih thu an sawi.

Serchhip Sub-Hqrs. YMA hnuaia Education & Youth Affairs Committee hmalakna in nimin khan Chhingchhip-a St. Peters School-ah Education Campaign chu neih chhunzawm leh a ni a, he Campaign-ah hian Dr. Lalrintluanga Sailo, Asst. Prof., Govt. Serchhip College leh Lalnunmawii Varte, SDPO te chuan Civil Service hrang hranga \halaite luh theih dan tur kawng te zirlaite hnenah an zirtir a. He hun hi Serchhip DEO, Lawmawma leh Vanlalchhunga, Coordinator, RUSA bakah Kawl\huama, Vice President, Sub-Hqrs. YMA te pawhin an hmanpui a ni.

Nimin khan rampumah National Achievement Survey neih a ni a, he Survey hi Mizoram-ah pawh neih niin Serchhip-ah pawh DIET buatsaihin National Achievement Survey hi neih a ni.

Pathianni zan inkhawm hlan khan Serchhip Dinthar Veng-a Upa T. Lalrawngbawla In-ah misual lutru in pawisafai Rs. 60,000/- vel rukchhuah a ni a, he In rawktu nia hriat hi Police te chuan an umzui mek.

Mizoram Larsap, Lt. Gen (Rtd) Nirbhay Sharma chuan Mizoram Public Service Commission (MPSC) Chairman atan Rev. Zosangliana Colney a ruat a, member thar atan PHE Department Secretary ni lai, V. Remthanga, IAS a ruat bawk. Hemi chungchang hriattirna hi nimin khan sorkar chuan a chhuah a, MPSC Chairman, PC. Lawmkunga a chhuah hnuah member Rev Zosangliana Colney hian Chairman hna lo chelh lailawkin, Chairman atana dah nghehna order sorkar chuan a ti chhuak ta a, member thar atan V. Lalremthanga pawh a dah nghal bawk a ni.

ZNP President, Lalduhoma chuan midang, an rilru alo tihnat tawh te chungah ngaihdam dilin, a bikinMNF leh Congress hruaitute leh an mipuite hnena ngaihdam dilin, Zoram mipuite pawh ngaihdam a \ulna apianga ngaidam turin a ngen.

Ni thum chhung awh tur Mizoram Legislative Assembly Session chu Vawiin hian neih \an a ni dawn ta.

India leh Myanmar insumdawn tawnna tur KMMTTP kawngpui laih mek chu chhunzawm mek zel a ni a, he hna thawh mekah hian hnathawh tur zatve aia tam thawh tawh a ni.

Ministry of Human Resource Development (MHRD) bultumin Inrinni khan Serchhip District-a Class-VIII zirlaite tan National Means-cum-Merit Scholarship (NMMS) Exam chu neih a ni.

PRISM hruaitute chuan MLA inthlanpui lo awm tur atan an inpeih tawh thu an sawi a. Chief Minister, Lal Thanhawla bial telin Bial 27 vel la thei tura an inngaih thu leh a aia tam zawk la thei tura hma an lak thu an sawi.

Mizoram University Vice Chancellor atan sorkar laipui chuan Professor KRS Sambasiva Rao chu a rawn ruat thar ta. Mizoram University in hun engemaw chen Vice Chancellor nghet a neihloh avanga zirlai ten lungawilohna an lantir hnuah leh sorkar leh tlawmngai pawl bakah zirlai pawl te pawhin sorkar laipui hnena thu thlena hma an lak hnuah Zirtawpni khan sorkar laipui-a Ministry of Human Resource Development chuan Vice Chancellor thar ruatna hi a tichhuak a ni. MZU VC thar tur, Prof. Krothapalli Raja Surya Sambasiva Rao hian kum 2014 October a\ang khan Acharya Nagarjuna University-ah Rector hna chelhin, kum 2015 April a\anga August thleng khan he University-ah vek hian Vice Chancellor hna alo chelh tawh bawk, amah hi Biotechnology Department Professor leh Chairman a ni.

MNF |halai, Mizo National Youth Front (MNYF) buatsaihin Inrinni khan Serchhip-ah 'Vangpui Feh-chhuah' hun hman a ni a, he hun hi MNYF President, Er. Lalrinawma, MLA leh Dr. K. Beichhua, MLA ten an rawn hmanpuiin zaithiam te nen Serchhip Bazar-ah hun hman a ni.

MNF |halaite chuan Zuangtui Kudam-a buhfai ei tlak loh, mipuite hnena semchhuah loh tura hnawl (reject) nia an sawi buhfai Ip \hahnem tak, West Phaileng Kudam-a dah tura Motor (Truck)-a hlan chu an nangching tih an sawi.

Bye Bye Malaria Foundation hmanga khawvela Malaria a bo theih nana hmalatu, Stuart Spani-a chuan Mizoram-ah Malaria vanga thihna a tlem chho telh telh niin a sawi.

Nimin khan MJA General Hqrs. chuan Ai-zawl-ah Executive Committee Meeting neiin MJA Member dilna hrang hrang lut zingah MJA Member atan mi 8 lakluh an remti a. Heng zingah hian Serchhip District a\angin Liantluanga Renthlei, Editor Vantawng (Thenzawl) leh R. Lalhminghlua, Editor Hrangturzo (North Van-laiphai) te chu an tel a ni.

Serchhip AOC Veng-a School Education Complex Building sak thar chu nimin khan Chief Minister,Lal Thanhawla chuan a hawng a. He Building sak thar lawmna hi P&E Veng YMA Hall-ah neih chhunzawm niin Chief Minister chuan Zirtirtute chu kawng engkim ah Zirlaite tan ‘Role Model’ nih tum turin a chah.

Chief Minister, Lal Thanhawla leh NITI Aayog Vice Chairman, Dr. Rajiv Kumar te chu nimin tlai khan Aizawl-a Chief Minister Bangla ah inkawmin hemi hnu hian Minister te leh sorkar mi pawimawhte Chief Minister's Conference Hall-ah an kawm nghal bawk.

Pathianni zan thimhlim khan Serchhip Ram-thlun Veng-a chenna In pahnih-a misual tu tih hriatloh lutin pawisafai a ruk sak a, hemi chungchang hi Serchhip Police ten ngawrh takin an chhui zui mek a ni.

Serchhip-a mi tlawmngai \henkhat te sum leh pai thawhkhawm a\anga lei, Serchhip damdawi In-a inzaina atana hman tur Monitor thar chu nimin khan damdawi In thuneitute kutah hlan a ni.

MLPC Act vangin kumin ah thubuai ziahluh a pung nasa Serchhip Police te chuan nimin khan Superintendent of Police, Lalringdika hovin a Office-ah kumin kum kal meka thubuai hrang hrang ziahluh dan thlirin Crime Review Meeting an nei a. He huna tarlan a nih danin nikum aiin kumin ah thubuai ziahluh nasa taka pungin hei hi MLPC Act hnuaia thubuai ziahluh nasa taka a pun vang niin a lang.