Serchhip-ah Crime Review Meeting neih a ni.

MLPC Act vangin kumin ah thubuai ziahluh a pung nasa

Serchhip Police te chuan nimin khan Superintendent of Police, Lalringdika hovin a Office-ah kumin kum kal meka thubuai hrang hrang ziahluh dan thlirin Crime Review Meeting an nei a. He huna tarlan a nih danin nikum aiin kumin ah thubuai ziahluh nasa taka pungin hei hi MLPC Act hnuaia thubuai ziahluh nasa taka a pun vang niin a lang.

Nimin a Serchhip District chhunga Police Officer rual ten Crime Review Meeting an neih hi DIG Northern Range huamchhung ami ten Crime Review Meeting an neih tur atana lo inbuatsaih lawkna pakhat niin he hunah hian SP, Lalringdika chuan Police te chu mipuite thlamuantu tur an nih thu sawiin, an hna thawhna kawngah theihtawp chhuah turin a chah a. Kumin chhunga thubuai ziahluh hrang hrang zingah chinfel tawh tam tak a awm chu lawmawm a tih thu sawiin, chinfel loha la awm te pawh a chhan zawtin, chhuifiah a chinfel dan dap a \ul thu a sawi bawk.

Nimin a Serchhip District Crime Review Meeting-ah hian kumin January ni 1 a\anga October 31 thlenga thubuai ziahluh dan leh chinfel dan te thlirho a ni a. He huna tarlan a nih danin nikum (2016) January ni 1 a\anga October 31 thlenga thubuai ziahluh aiin kumin hian thubuai ziahluh nasa takin a pung a, nikum (2016) khan thla 10 chhung hian IPC hnuaiah thubuai 80 leh Non-IPC hnuaiah thubuai 35, a vaiin thubuai 115 ziahluh a nih laiin kumin ah erawh IPC hnuaiah thubuai 57 leh Non-IPC ah 132, a vaiin thubuai 189 ziahluh a ni a, nikum aia kumin a thubuai ziahluh tamna hi 74 zet niin kumin a thubuai ziahluh nasa taka a pun chhan hi MLPC Act vang niin a lang a. Nikum chhung khan MLPC Act hnuaiah thubuai 19 chiah ziahluh a awm laiin kumin ah chuan thubuai 108 zet ziahluh a ni thung a, hei hian thubuai ziahluh hi a ti tam ta hle a ni. Thubuai ziahluh zawng zawng 189 zingah hian thubuai 161-ah Chargesheet thehluh ni tawhin Pending Investigation 16 a awm a, mi 111 te chu Court-in an chungthu ngaihtuaha thiamloh chantirin mi 50 te thubuai ngaihtuah mek a ni bawk a. Nikum lama thubuai hrang hrang zingah Court in thiam chan tira mi 4 a chhuah laiin kumin ah erawh thiam changa chhuak an la awmlo thung a ni.

IPC bikah hian nikum khan thubuai ziahluh 80 a awm laiin kumin ah chuan 57 chiah a awm a, thubuai ziahluh hi 23 in a tlem zawk a, nikum-a hemi hun chhung khan tualthah thubuai ziahluh 1 a awm laiin kumin ah chuan 2 ziahluh a ni a, mi suam leh rukruk thubuai nikum ah 41 zet ziahluh a nih laiin kumin ah chuan 33 chiah ziahluh a awm thung a, nikum-ah pawngsual thubuai 2 ziahluh awmin kumin ah ziahluh a awmlo bawk. IPC hnuaia thubuai ziahluh 57 zingah hian thubuai 41-ah Chargesheet thehluh ni tawhin thubuai 1-ah Final Report thehluh a ni tawh bawk a, Final Report thehluh hi thubuai chhuizui mai theihloh chi niin thubuai hrang hrangah Court in thiamloh a chantir mi 1 a awm tawh bawk a, Court-a thubuai ngaihtuah lai 34 an awm bawk.

Non-IPC hnuaiah kumin hian thubuai ziahluh 132 awmin heng zinga 120-ah Charge-sheet thehluh a ni tawh a, thubuai 1-ah Final Report thehluh ni tawh bawkin Pending Investigation 11 a awm bawk a, Non-IPC hnuaia thubuai hrang hrangah hian thiamloh chantir mi 104 awmin Court-a thubuai ngaihtuah lai 16 a awm mek bawk a ni.

Non-IPC hnuaia thubuai lut zingah hian MLPC Act hnuaia ziahluh tam berin 108 a awm a, ND&PS Act hnuaiah thubuai 14 ziahluh niin hei hi nikum lama ziahluh aiin 11 zetin a tam bawk a, naupang khuaikhem ching te hremna Dan, POCSO Act hnuaiah nikum khan thubuai 12 ziahluh a nih laiin kumin a tlahniam hretin thubuai 9 ziahluh a ni a, JJ Act hnuaiah nikum lamah thubuai ziahluh a awmloh laiin kumin ah thubuai pakhat ziahluh niin nikum lamah Copyright Act hnuaia thubuai pakhat ziahluh a awm laiin kumin ah thubuai ziahluh a awmlo thung a ni.