ZNP President in midang rilru alo tihnat tawhna zawng zawngah ngaihdam a dil

ZNP President, Lalduhoma chuan midang, an rilru alo tihnat tawh te chungah ngaihdam dilin, a bikinMNF leh Congress hruaitute leh an mipuite hnena ngaihdam dilin, Zoram mipuite pawh ngaihdam a \ulna apianga ngaidam turin a ngen.

ZNP President hian nimin khan Aizawl-a an party Office-ah he thu hi sawiin, kan rama political party hmasa ber chu Mizo Union a nih thu leh a policy langsar ber chu ‘Lal ban’ a nih avangin mahni leh mahni inbeihna leh inhuatnain Mizote hian politics bul kan \an tih a sawi a. "Chu chu kan political system-ah intuh nghet zelin, hnamdang tih dan entawn tlak loh tak tak te thlengin kan ching chho ve ta zel a. Mi mal insawichhiatna leh tlinlohna lai in hmuhsak tum reng rengin, chutiang remchang dap chuan kan hmanhlel a, a vehin kan inveh ta reng mai a. Ram siam \hatna tur hmun chu indona leh hmelma siamna hmunah kan chantir a ni ta ber mai. Ringtu kan nihna hi kan politics ah hian a lang hleithei ta lo," a ti a. Politician chu mi bum hmang, dawt sawi thiam, tlinna tur a nih chuan engmah pawisak nei lo, mi dangte sawichhe thiam ni tura ngaihna a len tak em avangin, mi \ha tam tak leh Kohhrana in hmang tak te phei chuan tel vena tlakah an ngaih loh phah nia sawiin, chu chu kan ram tan hlohna nasa tak a nih thu a sawi.

ZNP President chuan a politics zin kawng a bihlet in, mi dangte sawisel thiam leh hrat tak, an thil tih \hat pawh fak thei lo, an chetchhiatna lam erawh sawi nuam ti tak mi a ni \hin nia sawiin, hei hian tunhnai ah a Thlarau a tihnat thu leh a nun a hahdam theihloh thu a sawi a. Hruaitu kan lo neih tawh \hinte kha a hun lai mil zela Pathian min pekte an ni tih pawm duh loin a lo bei chiam \hin tih sawiin, thil sual leh diklo chu huai taka doin sawi zel tur chu a nih rualin an chunga rorelna chu Pathian kuta dah mai tur a lo ni zawk tih Bible-ah tarlan a nih thu a sawi bawk.

ZNP President, Lalduhoma chuan Pathian thu te chu Politics Field-a sengluh atana \ha a nih thu sawiin, "Mahni pawh engmah ni bik si lova midang ka lo sawisel nasat \hinzia te ka ngaihtuah a, mihring pawi chauh ni lovin Pathian pawi pawh ka lo khawih nasa hle tih hriattir ka ni a. Chuvangin, vawiin ah hian, ka tih theih chhun chu, Pathian lakah leh an rilru ka lo tihnat sak zawng zawngte laka ngaihdam dil hi a ni. A bikin MNF leh Congress hruaitute leh an mipuite hnenah ngaihdam ka dil a. Zoram mipuite pawh ngaihdam ka \ulna apianga min ngaidam turin ka ngen bawk a ni," a ti a ni.