Assembly Thlasik \hutkhawm neih \an Ni-ah MNF ten Session-a House Leader kal tur an dang

Mizoram Legislative Assembly Session chu nimin khan Aizawl-a Assembly House-ah neih \an a nia. MNF chuan Affidavit diklo hmangtu Chief Minister, Lal Thanhawla chu Assembly House-a \hu tlakah an ngaihloh thu sawiin, Chief Minister in Assembly House a pan tur chu an lo dang a. Hei hi Congress chuan mawilo an tih thu an sawi.

Mizoram Legislative Assembly Thlasik \hutkhawm nimin a neih hi Speaker, Hiphei chuan kaihruaiin hun hmasa berah Session hmasa leh tun Session inkara Member boral mi 3- Zakhu Hlychho, F. Lalzuala leh Col. Lalchungnunga Sailo te sunna hun hman a ni a, Anmahni sunna hunah hian House Leader, Lal Thanhawla; Opposition MNF Group Leader, Vanlalzawma leh Opposition MPC Member, Lalthanliana ten thu an sawi a, an mi sun te chu Politics lama hruaitu tling leh Kohhran lama hruaitu tling Upa vek an nih thu te, ram leh mipuite tana an tha leh zung bakah ngaihtuahna nasa taka seng \hin, mi entawn tlak an nih thu te an tarlang a, Member ten sunna hun ang hmang zui a ni. Hemi hnu hian Zawhna leh Chhanna hun hmangin rorelna kalpui chhunzawm nghal a ni bawk. 

Nimin a Assembly \hutkhawm ah hian Mizoram sorkara Parliamentary Secy te ruatna dan paih a ni a. Chief Minister, Lal Thanhawla’n “The Mizoram Parliamentary Secretaries (Appointment, Salaries, Allowances and Miscellaneous Provisions) (Repeal) Bill, 2017” chu pulutin he Bill hi State hrang hrangin Parliamentary Secretary an neih chu Supreme Court-in Assam-a Parliamentary Secretary-te bang tura a tih hnu leh Mizoram sorkara Parliamentary Secretary-te’n party hmai tihmawk lutuk loh nana an nihna an bansan hnuah a awm zui zel a \ul tawh loh avangin anmahni ruatna Dan paihna tur a nih thu leh sawi zui chiam ngai nia a lan loh thu a sawi a. Speaker-in member te a rawn hnuah lungrual takin a pass a ni.

Hetihlai hian MNF chuan Affidavit diklo hmangtu Chief Minister, Lal Thanhawla chu Assembly House-a \hu tlakah an ngaihloh thu sawiin, nimin khan Chief Minister in Assembly House a pan tur chu an lo dang a. Hemi chungchangah hian MNF General Hqrs. chuan nimin khan thu-chhuah siamin Chief Minister, Lal Thanhawla'n kum 2013 Assembly Election dawn khan Affidavit diklo a thehlut a, danin a thil neih zawng zawng tarlang turin a phut laiin, August 30, 2013-a ama hminga a lei fel thlap Kolkatta khawpuia a hmunhma ropui tak chu Nov. 8, 2013-ah chhechham meuhin affidavit-ah ziaklut tel lovin a zepru tih hmuhchhuah a ni tih an tarlang a. Mizo mipui leh Election Commission of India-te dawt a hrilh avanga MLA-a thlantlin a ni chu demawm an ti takzet tih sawiin, MNF chuan Chief Minister, Lal Thanhawla chu MLA ni tlakah a ngai lo tih an tarlang a, hei vang hian Chief Minister hiAssembly Session-a a kal tur chu nimin khan High School Field bulah MNF \halai hmalakna in lo dan tum a nih thu leh Police lam an tam avangin Police tha chakna hmangin a kaltlang lui tih tarlangin, a \ul ang zelin hma lak zui a ni dawn tih an tarlang a ni.

Hetihlai hian nimin vek khan Mizoram Pradesh Congress Committee (MPCC) chuan thuchhuah siamin Assembly Session \an Ni-a MNF General Hqrs. huaihawta an Party Workers ten tharum hmanga Chief Minister, Lal Than-hawla Assembly Session-a a kal tur a Bungalow bula an lo zim buai chu mawilo an tih thu an tarlang a. Hetianga chhan mumal pawh awm lo a Assembly House \hutkhawm pawimawh tak \an Ni-ah House Leader ber tel thei lo tura tharum hmanga MNF party-ten lo tibuai a, MLA te thlan chhan bulpui ber pakhat - Dan siam a, mipuite ro min relsakna hun pawimawh ber - Assembly session-ah pawh thu pawimawh ngaihtuah thei lo tura tharum hmanga an bei chu a thlangtlingtute leh Mizoram mipui zawng zawng zahlohnaah an a ngai tih an tarlang bawk.