Serchhip-a Vawk vulhtu ten Insurance an claim mek

Sawrkar laipui hnuaia National Livestock Mission behchhana Animal Husbandry and Veterinary Department leh National Insurance Company (NIC) thawhhonaa kalpui, Animal Insurance-ah ran 4,734 ziahluh a ni tawh a; Vawk thi 332 tan insurance sum Rs. 60,66,400 pek a ni tawh a. Serchhip-ah pawh chhungkaw pahnih chuan Insurance hi an claim mek a ni.
Kumin February ni 10-a tlangzarh tâk Animal Insurance-ah hian niminpiah, September 7, 2026 thleng khan Mizoram-a District 11 atangin ranvulhtu te'n an ranvulh lai 4,734 chu insurance an tihsak tawh a; insurance hi Vawk, Bawng, Sial, Kèl leh Beram tan tih theih a ni a, tun dinhmunah Vawk 4,710 insure tawh a ni a; Bawng 15 leh Kel 9 insure a ni tawh bawk.

Insurance tihsak rante chu khuarel chhiatna leh hri vanga an thih chuan ranvulhtute hnenah NIC hian ranvulh hlutna hùa chhût pawisa an pe thin a; niminpiah thleng khan hri lêng vanga Vawk thi 322 tan NIC hian insurance titu, ran vulhtute hnenah Animal Insurance kaltlang hian an ranvulh luman Rs. 60,66,400 an pe tawh a ni.

Serchhip Town atang pawhin chhungkaw 11 te chuan an Vawkvulh 116 te tan Insurance hi an ti a, chhungkaw pahnih te chuan hri leng avanga Vawk thi 40 te tan Insurance hi Claim in tunah hian sum engemaw zat an dawng tawh a, la dawn tura beisei an la nei mek bawk a ni.

Insurance hi ran len dan azirin pek tur a ni a; Vawk-ah Rs. 7,200 atanga Rs. 24,000 inkar pek tur niin, Bâwng leh Sial-ah Rs. 14,000 atanga Rs. 48,000 inkar leh Kêl leh Beram-ah Rs. 1,680 atanga 5,600 inkar pek theih a ni a. Insurance tih tawh rante hi an lo thih palh a, ranvulhtuten kim taka insurance pawisa dilna atana kim taka lehkha pawimawh thil tel ngaite nen insurance an dil a nih chuan NIC lam hian a rang thei ang bera chingfelin ranvulhtute Bank Account-ah pawisa an pe tur a ni a; ni 15 chhunga an chingfel hman lo a nih chuan sum an pek tur hi 12%-in a pung dawn a ni.