Pradhan Mantri Matru Vandana Yojana (PMMVY) hnuaiah kumin chhungin naupai 3,624 inziaklut tawh

Sawrkar laipui hnuaia naupaite tana hamthatna dawn theihna Pradhan Mantri Matru Vandana Yojana (PMMVY)-ah sawrkar kum kal mekah hian Mizoram-a naupai 3,624 ziahluh an ni tawh.
Mizoram-a PMMVY kalpuitu Directorate of Women & Child Development hotute chuan Akashvani News Aizawl zawhna chhangin, sawrkar kum kal mekah PMMVY hnuaiah hian naupai ziahluh tur target 7,100 an nei a, thla hmasa, August ni 31, 2026 thleng khan naupai 3,624 ziaklut tawhin hei hi target an neih zat atangin za zela 51.04 a ni a. Naupai inziaklutte zingah hian fa pakhatna atan mi 2,423 niin hei hi Department-in fa pakhatna inziahluh tur target 5,500 an neih atangin za zela 44.05 a ni a; fa pahnihna nei tur ziahluh tur target 1,600 an neih atangin naupai 1,201 ziaklut tawh bawkin, hei hi target an neih atanga chhutin za zela 75. 06 a ni thung.

PMMVY Scheme hi fatir naupaite tana hamthatna Rs 5,000 dawn theihna niin, fa pahnihnaah hmeichhia a nih chuan Rs 6,000 a dawn theih bawk a; he Scheme hnuaiah hian kum 2025–26 chhung khan Mizoram-ah naupai 5,841-in tanpuina hi dawngin an sum dawn zawng zawng chu Rs. 2,79,68,000 a tling a ni.

PMMVY atanga sum semchhuah hi Direct Benefit Transfer niin, Ministry of Women & Child Development atanga sum lo kal chu Aadhaar Based Payment in Nu Naupai emaw, Naupawm emaw te Aadhaar thlunzawmna Account-ah a lut thin a; hamthatna dawng tur hian naupai leh naupawm te hi Anganwadi-a an inziahluh a ngaih bakah anmahni leh naute hrisel tak an neih theih nan tih ve tur chi hrang hrang- Sub-Centre a Ante-Natal Checkup, damdawi In-a nau neih, naute pian hnuah vaccine lak tir te chu an tih ve thung a ngai a ni.

PMMVY hnuaiah hian kum tluanin a inziahluh theih a, hamthatna dawng kim turin naupai atanga thla thum chhunga inziahluh tur a ni a, a thlawnin mahni Veng Anganwadi-ah a inziahluh theih a, fa pakhatna leh pahnihna tur pai mek te lo inziaklut turin Directorate of Women & Child Development chuan an sawm bawk a ni.