Basic Foundation Training Course buatsaih tan a ni

Nimin khan Aizawl-a Administrative Training Institute (ATI) Training Hall-ah Combined Civil Service Officers thar mi 34 te tana buatsaih ‘Basic Foundation Training Course’ chu neih tan a ni a, he Training hawnna hi Adviser to CM (Finance & Planning) TBC. Lalvenchhunga chuan a telpui a ni.

Thla thar October 30 thlenga neih tur he Training hawnna ah hian Adviser to CM (Finance & Planning) TBC. Lalvenchhunga chuan Officer tharte chu an kal zelna turah duhsakna hlanin, “Induhsakna (favouritism) vanga tling ni lovin, in phu vanga tling in ni a, in chhuanawm hle a. Amaherawh chu, Officer tlin hi a tawpna ni lovin, a bul tanna zawk a ni. In thutna tur Office pawh nangmahni ta ni lovin mipui ta a ni zawk a. A lalna lai nuam ti a, mawhphurhna hlamchhiah si in nih chuan Officer hlawhchham in ni dawn a ni,” a ti.

Sawrkar hnathawkte chu sawrkar khawl nghet an nih thu pawh Adviser to CM chuan sawiin, “Democracy-ah in pawimawh em em a, danglamna thlentu tur in ni. File in khawih pawhin 'file phena mihring (nunna) awm' kha ngaihtuah thleng phak zel rawh u. Thlemna hrang hrang in la tawk dawn a, chutiang hunah chuan, 'Dan chhungah a awm em?' tiin inzawt thin ula, dik ngam ang che u,” a ti a. Officer zingah mahni ram hrechiang lo an awm thin tih tarlangin, ram chhunga zinchhuak tam tur leh kan lui te, kan ram awm dan te, hnam hrang hrang chengte leh an eizawnna te chena hrechiang turin a chah a. Mahni thawhna ram hrechiang lo Officer nih chu a zahthlak thu a sawi bawk.

Digital lama hmasawnnain awlsamna tam tak min pek rualin Artificial Intelligence rin leh lutuk a him lo tih pawh sawiin Adviser to CM chuan, “AI in a thlak (replace) theih turin awm suh u,” a ti a. Department-centric Official te, Service-Centric Officials-te vangin sawrkarin harsatna a tawk thin tih pawh sawiin, “Mipui dah pawimawh ber (citizen-centric) ula. In career hi chu in thil tih, in result leh in thawhchhuah (delivery) atanga teh ni zawk rawh se, chu chu in hnuhma (legacy) tur a ni. He Basic Foundation Training pawh hi service hrang hrangte inkara inpawhna leh thawhhona tha thlentu ni ngei rawh se,” a ti a ni.

He Training hawnna hi ATI Joint Director (Trg.) Lalrimawii Hmar chuan kaihruaiin ATI Director Rita Lalnunmawii pawhin thu a sawi a, Dan (rules) ringawt zir lova, hnathawhna hmuna hman tangkai tur 'soft skills' ngaih pawimawh a nih tur thu a tarlang a. Service hrang hrangte riak luta an training chuan inpawhna tha zawk a hringchhuak dawn tih sawiin, Combined Civil Service-a tlingte chu a ruala training vek theih dan tur an ngaihtuah mek thu leh 'Smart ATI' a an hmalakna sawrkarin a tih hlawhtlinsak avanga an lawmthu a sawi bawk.