Kolasib District Bawrhsap H. Dolianbuaia leh Cachar Bawrhsap Rahul Kumar Gupta IAS te chu nimin khan Cachar DC Conference Hall-ah inkawmin October 30, 2026-a Vairengte-a Inter-State Border Festival neih tur chungchang leh thawhhona turte an sawidun a. Vairengte-a Inter-State Border Festival neih turah hian infiamna hrang hrang - Futsal, Badminton, Volleyball leh Table Tennis te buatsaih a nih dawn bakah, hnam lam chi hrang hrang entir a ni anga, ATMA leh MZSRLM atangin Stall hawn a ni bawk ang. Hei bakah hian ramri hrula cheng mipuite ralmuang leh thlamuang taka an awm theihna tur te, ruihhlo dona kawnga tha thlah lova thawhho dan turte leh hmasawnna kawng hrang hranga District pahnih te thawhho dan turte an sawidun bawk.
Hemi rual hian Kolasib District Superintendent of Police Lalrinpuia Varte leh Cachar SP, Partha Protim Das IPS te pawh inkawmin an District huamchhunga dan kenkawhna (law enforcement) leh ruihhlo tawlhruk dona kawnga thawhho dan tur an sawidun bawk a. He hunah hian Kolasib Bawrhsap hi Kolasib-a DRDO Project Director, DIPRO leh ATMA-a Project Director bakah Official dang ten an tawiawm a ni.
