International Literacy Day vawi 60-na hmangin Mizoram-ah ziak leh chhiar thiam 99.8% a kai tawh
School Education Directorate Conference Hall-a International Literacy Day puala hun hman ah hian School Education Department Commissioner & Secretary chuan ziak leh chhiar thiam kawngah State dangin an neih ve loh Mizoram in chakna thuruk neiin, chu chu tlawmngaihna, midangte tana inpekna leh khawtlang mipui thawhhona tha a ni tih a sawi a, “Hei hi kan hmalakna leh hma kan sawn zel theih nana kan innghahna lungphum pawimawh a ni a, State dangte chuan sum leh pai budget sang tak tak an nei a ni mai thei, keini erawh chuan sumin a lei theih loh rohlu kan nei a, hei hian hmasawn zel thei turin beiseina sang tak min pe a ni,” a ti a. Ziak leh chhiar thiam hian ram hmasawnna a thlen rualin kan chenna leilung humhalh a pawimawhzia min zirtir tel ngei ngei tur a ni tih pawh sawiin, “Tunah hian Fully Literate State ni mah ila, kan hmabak ah tih tur tam tak kan la nei a, kan thiamna te kan tahhriam belh zel a ngai a ni,” a ti bawk.
International Literacy Day puala Aizawl-a hun hman hi School Education Director, Angela Zothanpuii chuan a kaihruai a, he hunah hian ULLAS-RAERIP Worksheet te, Skill Training Programme 2026-2027 te leh 220 schools Go Live te tlangzarh a ni bawk.
Mizoram ziak leh chhiar thiam dinhmun hi sawrkâr laipui hmalâknaa Periodic Labour Force Survey Annual Report 2023-2024 atangin za 98.2 a ni a, India ramah Mizoram chu 1st Fully Literate State a nih thu May 20, 2025 khân Chief Minister chuan a lo puang tawh a ni. Hemi hnu hian Govt. of India, Ministry of Statistics and Programme Implementation hmalâkna Periodic Labour Force Survey Annual Report 2025-26 atangin Mizoram literacy rate chu za 99.8-ah kaiin kum 2027 Chhiarpui-ah pakhatna ni ngei turin tunah hian tan lak mek a ni bawk.