Rate siam zawm lo te chungah hma la dawn

State Transport Authority (STA) chuan man chawia mipui phur lirthei zingah sawrkar rate aia sang lak ching an awm avangin dan zawm lova tlan luite man chhuah an nih chuan permit tihtawp sak thlenga hmalak sak an ni dawn tih an sawi.
State Transport Authority (STA) thuchhuah tarlan danin Mizoram-a passenger phur chi lirtheite permit pek chhuah ah sawrkar rate anga tlan tura intiam vek an ni tih sawiin, mahnia lo inchhiar to an awmin mipui tan harsatna a thlen bakah, hnamdang lakah Mizoram hmel a ti bal tih an sawi a, Sawrkar rate zawm lova tlan luite manchhuah an nih chuan a vawikhatna-ah an permit suspend a ni dawn a, a vawi hnihna-ah chuan an permit cancel a ni dawn tih an sawi bawk.

STA chuan Passenger phur chi lirtheite tana fare an hman mekah Auto Rickshaw chu kilometre khatah Rs. 35 niin kilometre dang a tlan belhin kilometre khat zelah Rs. 25 chu belh zel tur a ni a, Two Wheeler Taxi chu kilometre khatah Rs. 30 niin kilometre dang an tlan belhin kilometre khat zelah Rs. 20 zel belh tur a ni a, Four Wheeler Taxi chu kilometre khat ah Rs. 55 niin kilometre dang an tlan belh chuan kilometre khat zelah Rs 45 zel belh tur a ni thung a ni.

Sawrkar thuchuah tarlan danin dan zawm lo te chu mipui ten Directorate of Transport phone number (0389) 2316080, Mobile phone : 8369729905/9862142241-ah te report zel theih a ni an ti bawk.