Saitual District-in ‘Surakshit status’ kai phak

National AIDS Control Organisation (NACO) in India ram puma Mobilization AIDS Suraksha (MAS) campaign a buatsaih ah Saitual District chu Surakshit Status tling phakin Mizoram District hrang hrang zingah hetiang dinhmun kai phak awmchhun an ni. He tehna a ‘Surakshit Status’ kai tur hian 95-95-95 goal chu tlin a ngai a, hemi tur hian HIV kai zawng zawng atanga 95% ten an HIV status an hre tur a ni a, chung HIV+ hmuhchhuah zinga 95% chuan ART damdawi an ei tur a nih bakah ART damdawi ei zinga 95% in viral load suppression an nei tur a ni bawk a. August report-ah Saitual District chuan Surakshit status a kai thei ta a, Mizoram-ah chuan a kai thei awmchhun a la ni. He hmalakna hmang hian HIV inkaichhawnna darh nasa zel tur (chain of transmission) hi tihtawp (break) theih beisei niin kumin February thla atang khan he hmalakna hi kalpui a lo ni tawh a ni.