Phawngpui ramri sawiho

Nimin khan Lawngtlai-ah Bawrhsap Donny Lalruatsanga hovin Thaltlang khua leh Phawngpui National Park ramri chungchangah thukhawm neih a ni.

He thutkhawm Lawngtlai Bawrhsap Pisa a neih ah hian Bawrhsap Donny Lalruatsanga chuan Phawngpui National Park chu Mizoram ang pawh a ngaihhlut a nih thu leh a, National Park-a puan theih hmun Lawngtlai in a neih chu District tan pawh a chhuanawm hle tih a sawi a. Ramri chungchangah Thaltlang VC- te thu thlen pawh zahawm viau mah se, National Park a puan tawh a ni a, puan a nih laia ramri chungchanga lungawih lohna a awm loh avangin tun din hmun ah chuan tih danglam theih a ni lo tih a sawi a. “Kum 1997 ah State Notification a chhuak a, Pillar phun a ni a, a nihna ang taka kum 30 chuang kal tawh anih avangin kan rin a ngai a ni,” tiin thlak danglam theih a ni lo tih a sawi. Bawrhsap chuan Thaltlang khua tan pawh National Park avang hian hma-sawnna kawng a inhawn zel a beisei thu leh hma-chhawp pawh ruahman mek a nih thu a sawi bawk.

He thutkhawmna ah hian Thaltlang VC lam atangin ramri chungchangah an dinhmun leh harsatna sawite ngaihthlak a ni a, Marcellus Hunlawmawma, DCF, Wildlife Mizoram in thu sawiin Phawngpui National Park chu Gazetted in 1995-ah Preliminary Notification tihchhuah a ni thu leh kum 1997-ah Final Notification tihchhuah a nih thu sawiin, kum 1999-ah Pilar phun a nih thu a sawi a, Sanctuary leh National Park a puan anih dawn a procedure hrang hrang a tarlang bawk.

He hun hi LADC-a Forest changtu Executive Member HC. Lalengkima pawhin telpuiin Phawngpui National Park chu Sawrkar Gazetted a ni avangin tih danglam mai mai theih a ni lo a, a nih dan ang hian kan pawm tlan a ngai a ni, a ti a. Phawngpui National Park hi a hnai vaia khaw awm ten an khua hmasawnna atana an hman thiam a ngai tih a sawi bawk.