Aizawl Sipai chhuahsan ram chei thar bul tan a ni

Aizawl khawpui laili-a Assam Rifles te chhuahsan ram-a Heritage Court tlang-ah Aizawl khawpui chei tharna hnathawh bul tanna lungphun chu nimin khan Chief Minister Lalduhoma chuan lungphum a hawng a. UD&PA Minister K. Sapdanga leh Speaker Lalbiakzama bakah Minister leh MLA engemaw zat an tel a ni.

Assam Rifles chhuahsan ram Heritage Court tlang-a Aizawl khawpui chei tharna hnathawh bul tanna lungphun hawnna hunah hian Chief Minister Lalduhoma chuan Sipai chhuahsan ram hman dan tur reltu Advisory Committee chu mipui huapzo pawl hrang hrangte telna a nih thu leh an thu tlukna chu sawrkar thutlukna bik ni lovin mipui thutlukna zawk a nih thu a sawi a. “A ram hman dan tur rawtna hi kan dawng hnem hle a, tuna mi ang hian kan pawm ta a ni. Rawtna dang dawn belh kan tum tawh lova, tuna mi hi kan thutlukna tawp, ding reng tawh tur a ni. Mandir sawnna hi dap a ngai a. Hmun hma remchang a awm theih nan Pathian hnenah i dil ang u,” a ti a. “Bazar Bungkawn-a mimal leh pawl ten ram an neih, Aizawl Square atana siam tura tiha ram neitute be turin palai kan tir dawn a. Kan ram tan a ni tih hriaa rilru inhawng taka lo dawr turin ram neitute ka ngen a ni,” a ti bawk a. “Aizawl khawpui laili hi hmun mawi tak, naupangte tana lenna nuam, thalaite tana hmun tha, pitar leh putarte tan pawha hawi khawthawnna hmun remchang taka chantir kan tum a. Kan zavaia tan a ni tih hriain mitinin inhawng takin he hnathawh hi i thawhpui ang u. A thawktute pawhin a hlawkna lam chauh ngaihtuah lovin kan ram tan a ni tih hriain thahnemngai takin lo thawk se kan duh a ni,” a ti bawk.

He hunah hian UD&PA Minister K. Sapdanga pawhin hmasawnna Project an thawk dawn ni mai lovin kan ramin Pathian malsawmna ropui tak a dawn kan lawm tel tih a sawi a, “UT inthlan hmasa berah khan Aizawl laili atanga Assam Rifle sawnchhuah hi sawi rik a lo ni tawh a, an chhuahsan theih nan hian party tinten hma kan la vek a. Vawiina sawrkar hi kan vannei a, kan hunah a takin a lo thleng ta a ni. Kan zaa kan lawmna tur a ni a, lungrualna min thlentu ni nghal se a duhawm hle,” a ti bawk.

Aizawl-a Sipai chhuahsan ram cheithatna tur Master Plan hi UD&PA chuan duangin, ruahmanna an siamte chu Advisory Committee hmaah chhawpchhuah a nih hnuah siamthat ngai te siamthat a ni a. Advisory Committee-in a pawm tawh te bawhzuitu tur Steering Committee an awm leh a ni. Ruahmanna tlangpuiah chuan Saron Veng, BCM Biak In atanga intanin chhuah lamah kawngpui laih tur a ni a, Dak Inpui bulah a chhuak anga. Kawngpui thar sial leh kawngpui awmsa chei nan cheng vbc. 23 dah niin sanction pawh hmuh tawh a ni a, PWD ten an thawk ang.

Heng bakah hian Bazar Bungkawn atanga intanin ‘Aizawl Square’ chu mawi tak sak tur a ni a, Aizawl Square thlang-ah hian Police Outpost dah tura ruahman niin Saron Veng atanga Dak Inpui inpawhna kawngpui kiang hmun remchangah Aizawl khawpui laili chawmtu tur Power Sub Station bun tur a ni bawk.

Aizawl Lammual sir hmar lamah mi 2000 leng Vanapa Hall, Hall leh Auditorium dang nei tel, lirthei tam tham tak dahna nei sak tur a ni a. Architectural Design hi inelna hmanga neih tur a niin nimin atang khan Registration tih theih nghal a ni a. May ni 29 khian intihsiakna result puan hman tum a ni.

Vanapa Hall thar tur dawt chiah chhim lam tlang, Lammual thlir theihna remchang ni bawkah hian Tuizem lian dah tur niin mawi taka chei a, mipui thutna tur tam tak siam nghal tur a ni a. Canteen kual-ah Park nuam tak sak tur niin Vanapa Hall thar leh Tuizem dahna tur inkarah hian ‘Public Park’ sak a ni ang. Open Amphitheatre chu Dak Inpui hnaih, kawngpui thar kiangah dah a ni anga. Multi Level Car Parking a awm bawk anga, Kawngpui thar hmun tha laiah khaw thlirna sak tur a ni bawk. Hei bakah hian hmun zau tak chu Green Zone leh Walking Trails atan dah a ni.

Hei bakah hian Vanapa Hall ep tlang, Heritage Court chu chei that tur a ni a, building pariat chei that a, a thenkhat dang thiah tur a ni a. Sak belh pawh a awm bawk ang. Hmun mawi taka siam a ni dawn a, cheng vbc. 13 sengin PWD in hma a la dawn a. Hna bul tan mai turin khawl pawh an chhawp tawh a ni.

Tarlan tawh angin March ni 15, 2025 khan Assam Rifle ram hi Official-a Mizoram sawrkara hlanna neih a ni a. A kum khatna chamah a chei tharna hna kutthlak tanna neih a ni dawn ta a ni.