Mizoram chu khawtlang inkaihhruaina nei tha tak leh State ralmuang a nih thu Larsap in a sawi

Mizoram Larsap General (Dr) Vijay Kumar Singh chuan Mizoram chu khawtlang inkaihhruaina nei tha tak, India rama State ralmuang berte zinga mi, hnam bil inkara inepna liantham awm lohna, politic ngelnghet tak awmna a nih thu sawiin, hmasawnna pawh chak taka kalpui mek a nih thu a sawi.

India hmarchhak State-te tlawha lokal Centre for Contemporary China Studies (CCCS) Multi-disciplinary Team, Ministry of External Affairs-te chu nimin khan Aizawl-a Lok Bhavan-ah Larsap, General (Dr) Vijay Kumar Singh chuan kawmin, CCCS te chu hna pawimawh tak thawktu an nih thu leh an kal sual loh nan khawtual dinhmun leh ngaihdante zirchiang hmasa turin a chah a. Mipuite hriat chian hmasak chu thutlukna dik siam kawnga pawimawh a nih thu sawiin, Mizoram chu Agriculture-a innghat leh Chhiah lakluh tlemna anih thu a sawi a, Sate thang mek, hmasawnna ruhrel din chhoh mekna a nih thu leh hmasawnna pawh chak taka kalpui mek a nih thu a sawi bawk.

Larsap chuan Mizoram chu khawtlang inkaihhruaina nei tha tak, India rama State ralmuang berte zinga mi, hnam bil inkara inepna liantham awm lohna, politic ngelnghet tak awmna a nih thu sawiin, tunhnaiah Mizoram chanchina vawi khat nan Aizawl chu India Railway Map-ah a lan thu leh Kaladan Multi-Modal Transit Project (KMMTTP) nen thlunzawmin Mizoram chhim tawp thleng Rel kawng siam tum a nih thu a sawi a, hei hian India hmarchhak hmel hmang a thlak danglam dawn thu a sawi bawk.

CCCS Team hi CCCS hnuaia thiamna hrang hrang nei member 12 awmna Multi-disciplinary Team niin March 9 atanga 18 chhung hian India hmarchhak State hrang hrang an tlawh dawn a, CCCS hi Ministry of External Affairs thluak bur pawimawh tak niin, China dinhmun leh hmalaknate zirchianga a tul anga Sawrkar Department hrang hrangte hnena hmalak dan tur kawhhmuha thurawn petu a ni a. Indo-Myanmar ramri depte tlawhin khawtual mi leh District thuneitute kawmin thil awm dan an zirchiang thin a ni.