Chapchar Kut thlirlet

Tun thla ni 13-a Serchhip-a Chapchar Kut hman zawh tak thlirletin nimin khan Serchhip-ah Bawrhsap, Paul L. Khuma kaihhruaiin sawrkar Department hrang hrang leh tlawmngai pawl aiawh te an thukhawm.
Serchhip DC Pisapui Hall-a thutkhawm ah hian Working Committe Chairman leh Serchhip Addl. DC, Lalrinzuala chuan thuhma a sawi hnuah Working Committee Secretary leh Sub-Hqrs. YMA Serchhip-a Secretary Zonunsanga Kawlni chuan kumin-a Serchhip khawpui-a Chapchar Kut an hman dan tlangpui sawiin, Treasurer, R. Lalramdinmawii DCPO chuan sawrkar atanga sum hmuh a nih dan leh Chapchar Kut atana sawrkar Department hrang hrang ten sum leh pai a thawh dan te a tarlang a, hemi hnu hian Meeting-a tel te hian Chapchar Kut hman zel tur atana an ngaih pawimawh te an sawiho bawk a ni.

Nimin-a thutkhawm te hian kumdang lo kal lehzel turah uar zawka Chapchar Kut hman a nih theihna turin ahma lama thutkhawm neih thin tawh an rel a. Bawrhsap Paul L. Khuma chuan kumin ah Chapchar Kut hlawhtling tak kan hmang nia a hriat thu sawiin, Department 34 lai ten he Kut hmanna atana sum leh pai an thawh chu hlu a tih thu leh thawhhona tha tak an nei chu lawmawm a tih thu a sawi a. Working Committee hmalakna fakin, sawrkar hnathawk te pawh Chapchar Kut ah hian an tel tam deuh deuh a tul thu a sawi bawk.