Mizoram-ah eirawngbawlna Gas a thleng tluang; ramdang ah dan lova tuialhthei hralh khap a ni

Food, Civil Supplies & Consumer Affairs Department chuan Mizoram-ah eirawngbawlna Gas a thleng tluang tih sawiin, mipuite chu tul lova LPG chhekkhawl lo turin an chah a. Serchhip District-a Petrol leh Diesel hralhchhuah chungchang ah thupek tihchhuah a ni bawk.
Mizoram sawrkar FCS&CA Department chuan tunlai khawvel Geo politics boruak avangin mipuiten eirawngbawlna gas-ah harsatna an tawh loh nan India Sawrkar chuan theihtawpin hma a la reng tih sawiin, State Sawrkar pawhin mipuiten harsatna an tawh loh nan chak takin hma a la reng bawk tih an sawi a. Tun dinhmunah nitin-a Mizoram mipuite mamawh zat LPG chu bur 7,900 vel a nih thu sawiin, LPG Distributor hrang hrangah harsatna liantham awm lovin LPG a thleng mek zel tih sawiin, Mizoram in LPG kan lakluhna, IOCL Bottling Plant, Borkhola-ah pawh harsatna awm lovin kan State mamawh ang tawk lak zel a la ni tih an sawi a. Hei bakah hian India sawrkarin mipuiten tul lova LPG bur an chhekkhawl loh nan LPG booking tih hnuhnun ber atanga booking tih leh theih hun inkar chu ni 25-ah a rawn bituk thar tih an sawi bawk a ni.

Hetiang boruak kaihhnawihah hian mi duham thenkhatin tul lova LPG bur an chhekkhawl loh nan leh man to zawka dan lova an hralhchhawn loh nana hma la turin March 17, 2026 khan Sawrkarin State Level leh District Level Monitoring Cell a din thar a. He Cell hian mipuiten an chanvo dik tak leh a mamawh tak tak ten LPG bur an dawn theih nan hma a la dawn a. Hetianga chak taka State Sawrkarin hma a lak avang hian mipuite chiai lo tur leh, tul lova LPG chhekkhawl lo turin mipuite chu ngen an ni a, LPG pawh renchem taka hmang turin mipui te an ngen bawk a ni.

Hetihlai hian tunlai hian mi thenkhat ten kan thenawm ram Myanmar lama hralhchhawn leh turin Serchhip District chhung Filling Station thenkhatah Tuialhthei a hlawmin an la thin tih hriat a nih avang leh hei hian mipuite tan harsatna lian tak a thlenin,Serchhip District chhungah Petrol leh Diesel indaihlohna a awm phah fo thin tih hriat a nih avangin Serchhip District Magistrate, Paul L. Kuma chuan etrol leh Diesel hralh leh lei chungchangah Section 163 of Bharatiya Nagarik Suraksha Sanhita, 2023-in thuneihna a pek angin thupek a tichhuak a. He thupek-ah hian Serchhip District chhunga Filling Station ten Sawrkar in man (rate) a bithliah aia sang (Black Marketing) in Petrol leh Diesel an hralh tur a ni lo tih te; Serchhip District chhunga Filling Station zawng zawng ten Petrol litre 500 leh Diesel litre 1000 chin chunglam chu phalna neia dahthatna (Storage permit) nei te hnenah chauh an hralhchhuak tur a nih thu leh Petrol leh Diesel sumdawnna kaihhnawih thilah kan thenawm ram Myanmar leh ram dangah dan lova hralh emaw, pekchhawn emaw khap tlat a nih thu a tarlang a. Thupek zawm lo chu Section 223 of Bharatiya Nyaya Sanhita, 2023 dan hmanga hrem theih an ni ang.