Mizoram Legislative Assembly thutkhawm zawhfel a ni

Mizoram Legislative Assembly Budget Session chu ni 17 chhung neih a nih hnuah nizan hmasa khan zawhfel a ni ta.

Thla hmasa February 17 atanga neih Mizoram Legislative Assembly Budget Session hi tluang taka neih a nih hnuah nizan hmasa khan zawhfel niin Speaker Lalbiakzama chuan tiamchin awm lovin thutkhawm hi a titawp a. Ni 17 chhung awh he thutkhawm neih a nih chhung hian tluang taka rorelna kalpui niin House chhunga tawngka a chhan hi zawhna (Starred question) 1248 lut zingah zawhna 1231 pawm a ni a, House-ah zawhna 300 chhan tura chhawpchhuah niin zawhna 27 chu hnuhlet a ni tung a, Ziak a chhan chi zawhna (Un-Starred question) 396 lutin zawhna 376 admit a ni bawk.

Thutkhawm neih chhung hian House Dawhkan-ah Report 7 dah niin Official Resolution pahnih leh Private Member Resolution 110 a lut bawk a, Member 10 in an dil angin Resolution 20 chu withdraw a ni a, Official Resolution-ah Education Minister Dr. Vanlalthlana putluh ‘8th Schedule to the Constitution of India-ah Mizo tawng telh tura hmalak ni rawh se’ tih chu passed a ni a, Private Member Resolution pathum sawiho niin pahnih chu sawiho a nih hnuah pawm a ni a, pakhat erawh hnawl a ni thung a. Speaker sawi danin House-ah hian lehkha pawimawh 30 pharh a ni a, Government Bill 10 lutin a vaiin passed vek a ni a, Motion 3 putluh a ni.

Speaker Lalbiakzama chuan House chhungah ngaihdan inanglo deuhah indawh tawnna a awm chu lawmawm a tih thu sawiin, a Mizo zia hle tih a sawi a, India rama House chhunga awmdan mawi tia hriat an nih chu chhunzawm zel turin member te a sawm bawk a ni.