Exam tur Zirlaite tan Helpline siam tum a ni

Nimin khan Prime Minister Programme, Pariksha Pe Charcha 2026 chu Aizawl-a Govt. Mizo High School Multipurpose Hall, MacDonald Hill-ah School Education Minister Dr. Vanlalthlana hovin live-a lo thlirho niin Minister chuan Exam tur avanga zirlaite harsatna sutkian nan helpline siam tum a nih thu a sawi.

Pariksha Pe Charcha 2026-ah hian Prime Minister Narendra Modi chuan Delhi-ah State tin atanga zirlai thlanchhuah kalkhawmte chu kawmin exam hmachhawn dan turte leh zirlaite zirna atana tangkai tur thil chi hrang hrang a sawipui a, Mizoram atang pawhin PM Shri KV School, Aizawl-a Class XII zirlai Lalthlamuanpuii a tel a ni. He programme hi live-a pekchhuah niin, India ram hmun hrang hranga zirlai leh zirtirtuten an lo thlir a ni.

Nimin-a Aizawl-a he hun hman ah hian School Education Minister Dr. Vanlalthlana chuan kalkhawmte hmaah Exam lai hian pressure a san thin avang leh chu chuan zirlai tam takah harsatna a siam thin avangin Psychologist Association-te nen tanghovin helpline siam tum a ni tih sawiin, tihhlawhtlin theih a nih chuan zirlai tam tak tan a tangkai a beisei thu a sawi a. “Exam hmachhawn chu thil peihawm loh tak ni mah se puitlinna kawng zawh nan paltlang a ngai a, harsatna paltlang hian chakna min pe a, exam hian chakna min pe thin a ni,” a ti. Education Minister chuan kan thluak hi kan hman tam zawh pauh leh a chak a, thluak hi sawizawi a ngai thin tih sawiin, “Exam hian kan thluak a sawizawi a, a tichak thin a, thluak tichak turin exam hi a pawimawh a ni,” a ti bawk.

Nimin-a Pariksha Pe Charcha-ah hian zirlai kalkhawmte chuan Prime Minister chu Pariksha Pe Charcha an hlawkpuizia te an hrilh a. Mathematics hlau thin khan Pariksha Pe Charcha atang hian an hlauh tawh loh thu leh thian ang maia an ngaih tak thu te an hrilh bawk a ni.