Aizawl-ah Multi-Media Campaign (Red Fest) nei

HIV/AIDS chungchang inzirtirna, ‘North-East Multimedia Campaign (Red Fest)’ chu nimin khan Aizawl Falkland-a LPS Arena-ah hmangin Health Minister Lalrinpuii chuan khuallian niin a hmanpui.

Mizoram State AIDS Control Society (MSACS) leh National AIDS Control Organization (NACO) tangkawp buatsaih North-East Multimedia Campaign (Red Fest)-ah hian Health Minister chuan he Red Fest-in a tum HIV laka kan him leh him loh hriatchian nana in test a pawimawh zia a sawi a. Mizoram chu India rama HIV vei tamna ber State kan ni chu pawi a tih thu leh HIV do kawngah kan tanrual a pawimawh thu a sawi bawk.

Mizoram-a HIV veite zingah 60% chu mipat-hmeichhiatna avanga kai an nih thu Minister chuan sawiin, kalkhawmte chu an nun uluk turin a chah a. HIV laka inven dan ABC approach sawifiahin kalkhawmte chu zawm ngei turin a chah bawk a, Approach tha ber ‘A’ chu Abstinence, mipat-hmeichhiatna laka fihlim a ni a, ‘B’ chu Be faithful, kawppui pakhat laka rinawm a ni a, ‘C’ chu Condom hman a nih thu a sawi bawk.

Multi-Media Campaign (Red Fest) hi 2018 atanga buatsaih tan niin, Nagaland-ah neih hmasak ber a ni a, kumtin state hrang hrangah neih a ni thin a. Kumin hi Mizoram-in kan thlen kum a ni.