Kumin-ah ‘Mizoram Tourism Conclave’ buatsaih turin ruahmanna siam a ni

Tourism Minister Lalnghinglova Hmar leh NITI Aayog Member Dr. VtK. Paul te chu nimin khan inkawmin kumin hian Mizoram Tourism Conclave buatsaih nise an ti a. Hemi chungchang ngaihtuah hian kumin kum chanve hma lamin kokim zawkin thutkhawm neih leh nise an ti bawk.

Nimin khan New Delhi-a NITI Aayog Headquarters-ah Tourism Minister leh NITI Aayog Member, Dr. VK. Paul te hi inkawmin Minister Lalnghinglova Hmar chuan tunhnai kumhnih chhungin Mizoram tlawhtu nasa taka an pun thu leh September 2025-a Sairang thleng Rel a luh hnuah phei chuan beisei phak bakah Tourist an pun thu a sawi a. “Tunah chuan Guwahati atangin tlai khat thilthuah Aizawl a thlen theih tawh a. Thlawhna leh Rel a inkalpawhna a awlsam tawh avangin Mizoram tlawhtu an pun zel kan ring. Heng kan State rawn tlawhtute lo dawnsawn dan tur te, an thlenna leh ei leh in chungchanga lo inbuatsaih te, an en tur leh tihtur lo siamsak chungchangah te hmalakna tur tamtak a la awm a. Theihtawp chhuah mah ila keini chuan thlen tâwp chin kan nei,” tiin NITI Aayog chu rem ruat pui a, hma lak pui turin a sawm a. Mizoram mawina chu infrastructure ropui ni lovin khuarel mawina a nih thu sawiin, tlang leh ruam, lui leh dil mawi tak takte tichhe si lova tourist hipna’n tihhmasawn a duh thu a sawi bawk.

NITI Aayog Member Dr. VK. Paul chuan Mizoram chu tunhnaiah 100% Literacy rate nei thei, State ralmuang leh tlawh chakawm a nih thu sawiin, Tourism Conclave chu Mizoram thatna leh mawina te phochhuahna remchang a nih tur thu leh a tulna apiangah Mizoram sawrkar pui tura NITI Aayog a inhawn thu a tarlang a. Mizo-ram tlawhtute bakah State mipui kaihhruaina’n Tourism Policy mumal tak buatsaih thuai tul a tih thu a sawi bawk.

He inkawmna ah hian Mizoram Tourism Conclave chu Aizawl emaw, a bulhnaiah hman nise, a hun atan kum chanve hnulam, boruak nawm lai nise an tih bakah International Tourism Mart emaw, Mizorama Kût awmsa nen kaihkawpa lian leh zau zawka hman dan ngaihtuah tha an ti a. Kum chanve hma lamah kokim zawkin New Delhi-ah thutkhawm neih leh nise an ti bawk.