April thla tawp hma ngei a kawng siam hna zo turin hriattir

Gauhati High Court, Aizawl Bench-a Judge pahnih thutna Bench chuan Mizoram Truck Drivers Association (MTDA) thu thehluh chungchangah tun thla ni 4 khan thutlukna siamin Sairang leh Bilkhawthlir inkar kawngpui siamtu Contractor chu kumin April thla tawp hma ngeia kawng siamthat hna zo turin a hriattir.

Justice Marli Vankung leh Justice Mridul Kumar Kalita-te thutna Bench hian Kawnpui leh Sairang inkar kawngpui dinhmun chhe tak chungchanga MTDA-in nikum (2025) lama PIL an thehluh chu a ngaihtuahna kal zelah Nilaini khan thupek a chhuah a. Helai kawng siamtu Contractor J. Infratech Ukil Anil Kumar chuan hnathawktu Project-I ah mi 87 leh Project-II ah mi 96 an chhawr mek thu Court a hriattir a. Heng bakah hian Excavator panga, Back hoe loader panga, Tipper 13, Roller pasarih leh Water Tanker pali te'n hnathawhna hmun an vil reng thu Court hi a hrilh a. Court chuan J. Infratech Ltd. chu Bilkhawthlir leh Kolasib inkar kawngpui, Kawnpui leh Khamrang inkar leh Buichali leh Sairang inkar kawng siam thatna ah chuan theihtawp chhuah tur leh hnathawk leh hmanrua dah belha hman belh zel turin thu a pe a, an hnathawh chu kumin April thla tawp hma ngeia zo turin thu a chhuah bawk a ni.

High Court chuan J. Infratech Ltd chu kumin January ni 22-a Meeting minute hmanga hrilh an nih anga hmanrua belh a nih dan leh hna kalpui hmasawnna chu Additional Affidavit hmangin thehlut turin thu a pe bawk a. He thubuai hi thla thar March ni 11, 2026-ah ngaihtuah leh turin a ruat nghal niin Ukil te chuan an sawi bawk.