ZPM in CBI-ah FIR an thehlut dawn lo, General Consent dil chuan an pe ngei dawn tih an sawi

ZPM Party chuan Lengpui leh Siphir ram Indian Air Force (IAF) hnena hralh/hlan chungchang ah Central Bureau Investigation (CBI) hnena FIR thehlut an awm avangin an thehlut ve ta lo tih sawiin, CBI-in Mizoram sawrkar hnenah Genral Consent an dil chuan pek ngei a nih tur thu an sawi.

ZPM Media Committee Chairman leh Minister ni bawk, B. Lalchhanzova chuan nimin khan Aizawl-a an Party Office-ah thuthar thehdarhtute kawmin February 4, 2026-a Council of Minister thukhawm zawh ah IAF hnena ram hralh chungchang hi an ngaihtuah thu sawiin, “Kan Chief Minister chuan sawrkar laiin FIR thehluh chu a kalphung ni lo viau mah se, MNF leh Congress Party-in thehluh an tum tak si loh avangin thehluh mai tha a ti a ni,” a ti a. FIR chu Revenue Minister a nih anga a hminga thehluh turin thutlukna an siam thu sawiin, “Mah se, kan Party Legal Department lam kan rawn hnuah Minister nihna anga thehluh chu chi lo deuhah an ngaih avangin, Media Chairman ka nihna anga thehluh tura tih a ni,” a ti bawk.

An party thil tum an lo hriat hnuah MNF chuan February 4 zan-ah Media mite Chief Vigilance Officer (CVO) hnena ngenna an thehluh turah sawmna an siam thu sawiin, “MNF hian an ti chawp ta chung chung a ni. Document mumal pawh an thehlut tel lo. MNF-in an thehluh takah chuan Congress lam pawhin an thehlut ve leh a ni,” tiin “Congress in dan dik taka CBI a an thehluh thu ZPM PAC beng a lo thleng chawpchilh ve ta a. ‘Kan thangkam in a awk tha khawp alawm’ tiin ZPM party hminga CBI-a thehluh ve kher chu tul ta lo ah a ngai a, CBI in he Case hi dan ang taka a chhui theihna Consent pe ila, CBI tha I ti chak zawk ang u a ti ta a ni,” a ti a, CBI-te General Consent pek ngei an nih tur thu a sawi bawk a ni.

B. Lalchhanzova chuan September 26, 2019 khan Aizawl DC, Vanlalngaihsaka chuan IAF hnenah an ram tur GPS hmanga enfel vek a nih tawh thu a hriattir tih sawiin, “Aizawl DC hian Environment Clearance a ngaih loh thu te, dodalna a awm loh thu te, a mi cheng chhawmdawlna pek ngai an awm loh thute a lo hriattir daih tawh a ni. He thilah hian dan dik loa mantang ei an awm chuan hremna hmu ngei se kan duh. Tumah zuah ngai kan ti lo,” tiin mipuite chu MNF leh Congress Party mite thusawi lo pawng awih ngawt thin lo turin a chah nghal bawk.