Latest News

Phailam Journalist ten Aizawl Press Club an tlawh

Mizoram leh Assam ramri buaina a hmuna thil awmdan hrechiang tura rawn kal, Phailam Journalist thenkhat te chuan nimin khan Aizawl Press Club tlawhin MJA Member te nen inkawmna an nei.

Nimin-a an inkawmkhawmna hi MJA Gen. Hqrs. President Zonunsanga Khiangte chuan kaihruaiin tunhnaia ramri-a thil thleng chungchanga thil thlen dan dik tak hrechiang tura a buzawl ngeia rawn luhchilhtu National Media-te an lo lawm tih a sawi a. Mizoram chu ram kilkhawra awm a nih avangin a ram leh a chhunga chengte chanchin ramchhung hmun danga Media lian zawkten an hrechiang tawk lo fo thin nia an hriatna chu, tuna rawn kalte chuan an rawn thlak danglam ta nia an hriat thu a sawi.

Phai lam Media lokal zinga a senior ber Subir Bhaumik (NDTV) chuan Mizoram chanchin leh thuthar awmte hriat zung zung theihna turin Mizo journalist-ten tan an lak deuh deuh a tul nia a hriat thu sawiin, thalai zawkte chu tuna an thlen chin duhtawk mai lo turin a fuih a. CNN IBN Reporter Amit Pandey chuan tun tum ramri-a thil thleng leh ni dang ah pawh, Mizoram kaihhnawih thil hriat duh an neihte State aiawh ni theia an ngaih an zawh ten chhanna an pe tha ngam lo fo thin tih sawiin, hei hian an duh angin report lai leh kimchang zawk an pek theih loh phah chang a awm tih a sawi bawk.

Tualchhung journalist te leh phai lam atanga rawn kal journalist-te hian tha zawka thawhho dan turte, State hrang hranga Journalist-te an inpawh tlan lehzual theih dan tur nia an hriat te an sawiho bawk a. Ramri buai kaihhnawiha rawn kal phai lam Media tam zawk hi Vawiin hian an haw dawn a, thenkhat rawn luh belh an awm laiin ramri lama chambang mekte pawh an awm a ni.

Comments

Chhiar Hlawhte