MPYCC in lungawiloh lantir

Mizoram Pradesh Youth Congress Committee (MPYCC) leh National Student Union of India (NSUI) Mizoram OB te chuan Assam Chief Minister Himanta Biswa Sarma chet dan leh Assam-in NH. 306 an dan pin avanga lungawi lohna nimin khan lantirin India President hnenah lungawilohna an thlen bawk.

MPYCC leh NSUI (Mz) hruaitute hian Aizawl-a Raj Bhavan hmarlam Gate bulah lungawilohna hi lantirin he hunah hian MPYCC President, Dr. Lalmalsawma Nghaka chuan Mizoram mipui nunna atana innghahna hnar ber National Highway 306 Assam-in an dang ping tlat tih sawiin, “Heti chunga Ministry of Home Affairs-in hre reng chunga ngawih a chuh hi kan dem hle. Hemi chungchanga ngawih chuh tlat Prime Minister Narendra Modi leh Union Home Minister Amit Shah hi kan dem takzet bawk,” a ti a ni.

He hunah hian MPYCC te hian India President hnenah an lungawi lohna point hrang hrang, hmalak nghal ngai nia an hriat te chu Mi-zoram Governor kaltlangin ziakin an thlen nghal a. He an lehkha thehluh ah hian Assam-in a State thenawm Meghalaya, Nagaland leh Mizoram-te nena ramri buaina a neih avang te, Mizoram leh Assam ramri buai avanga nunna chan leh hliam an awm tak hial avangin India hmarchhaka remna leh muanna a awm theih nana i inrawlh turin an ngen a. Assam Police ten July 26, 2021-a Mizo-ram chhunga ralthuam famkim nena rawn luta Mizoram Police Out Post tharum hmanga an hnehchhuh chu an dem thu leh hmanraw hlauhawm tak takin mipui pungkhawm an beih bakah silai an hmehpuah thu te tarlangin, India dan kalha Mizoram in pur a chawkna kawng awmchhun, National Highway 306 Assam-in an dang ping chu an dem thu leh Mizoram bungraw lakna Rel kawng Assam State chhunga misualin an tichhia chu an dem thu te pawh an tarlang a ni.