Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Speaker in a bial chhunga leiminna hmun a tlawh

Mizoram Legislative Assembly Speaker, Lalrinliana Sailo chuan niminpiah khan a bial chhung Khawruhlian leh Hmunnghak khua te tlawhin tunhnaia ruahsur nasa avanga hmun hrang hranga leimin leh lei tawlh te a hmunah a en.

Khawruhlian khaw hnuaiah hian NH. 150 cheithat leh tihzauhna turin kum 2017 atang khan kawngpui laih tan niin hei hian Khawruhlian khaw innghahna leilung a khawih che viau niin a lang a. Leimin leh lei tlahniam hmun hrang hrangah a siam zui a. Furpui thlen apiangin harsatna an tawk kumtin a, niminpiah khawvar hmaa ruah sur khan leimin hmun hrang hrangah siamin Khawruhlian thlen hma hmun thenkhatah nasa takin lei a min a, chungte chu lirthei kaltlang theih tura thenfai nghal niin Khawruhlian leh Hmunnghak inkara leimin erawh thenfai theih a nih loh bakah kawngpui hi a pumpui deuhthaw a bal a ni.

NH. 150 kawng thar laih mek hi peihfel a la nih loh bakah hmun hrang hrangah leimin-in a hnawh bakah Khawruhlian leh Hmunnghak inkalpawhna kawngpui, kawng hlui zawk a chim tak avang hian hmarlam khaw 30 chuang zet chu kalpawh theihloh in a awm mek a. He kawngpui hi Mizoram atanga Manipur kalpawhna kawng pakhatah hman thin niin ruahmanna ang chuan tuna kawng thar laih mek siam zawh a nih hunah chuan Act East Policy hnuaiah Kaladan Multi-Modal Transit Transport Project-a kawngpui sial mek hi a pawh dawn a ni. Khawruhlian khaw hnuaia NH. 150 laih mek zuk pawh tur hian Khawruhlian khaw hmun laili lai tak atangin kawng thar (diversion) laih tumin ruahmanna siam a ni.

Comments

Chhiar Hlawhte