Latest News

Gauhati High Court in RT-PCR din tur Committee kar khat chhunga din turin sawrkar a hriattir

Gauhati High Court, Aizawl Bench chuan Mizoram sawrkarin chhim bial-in RT-PCR khawl a mamawh lo nia Gauhati High Court-a thu a thlen chu pawm lovin, nimin atanga chawlhkar khat chhunga RT-PCR din tur Committee din turin Mizoram sawrkar chu a hriattir bawk.

Mizoram chhimlam District pali tana Civil Hospital, Lunglei-a RT-PCR khawl dah chungchanga RT-PCR Lab for Chhimbial te PIL thehluh chungchang ngaihtuahtu Divisional Bench (DB), Gauhati High Court, Aizawl Bench chuan nimin khan thutlukna puangin Mizoram sawrkarin High Court hnena chhim bialin RT-PCR khawl a mamawh lo nia a thlen chu pawm lovin, nimin atanga chawlhkar khat chhunga RT-PCR din tur, Committee din turin sawrkar chu a hriattir a. High Court chuan Mizoram sawrkarin Committee a din turah hian YMA Lunglei Sub-Hqrs. President leh Chief Organiser, Lunglei Thalai Pawl telin member pali aia tlem lo awmna ni turin a hriattir a. He Committee hi an din atanga ni sarih (7) chhungin Civil Hospital, Lunglei-a RT-PCR Laboratory building thar peih a nih hmaa Laboratory bun lailawk theihna tur Tourist Lodge emaw, Building remchang dang emaw enfiah turin a ti bawk.

Mizoram puma COVID-19 damlo enkawlna hmun, COVID Dedicated Hospital pakhat chauh awm chu High Court chuan tha ti lovin, tunhnaia Zoram Medical College (ZMC) panna kawnga nau nei tur Vansangpuii thihna a thleng chu thil runthlak (serious) tak a nih thu pawh a sawi a, ZMC in a zawh tawk bak damlo an admit chu tha ti lovin, hmun dangah pawh COVID-19 kai te enkawlna siam tur a tih bakah, COVID-19 thawh thumna atana inbuatsaihna tha tak nei ngei ngei turin High Court chuan Mizoram sawrkar a hriattir bawk a ni.

RT-PCR for Chhim bial te PIL thehluh hi Divisional Bench (DB), Gauhati High Court, Aizawl Bench in hun engemaw chen a ngaihtuah hnuah July 27 leh 28, 2021 khan Final Hearing neih a ni a. Mizoram sawrkar tan Guwahati atanga lo kal Diganta Das, Advocate General leh AD. Choudhury Addl. Advocate General te an ding a. Delhi atangin RT-PCR Lab for chhimbial tan JC. Lalnunsanga a ding thung a. He thubuai hi biak hmuh theih kaltlanga ngaihtuah thin a ni.

Comments

Chhiar Hlawhte