Tharum thawhna hmanga buaina chinfel tha ti lo

Home Minister Lalchamliana chuan tharum thawhna hmanga buaina chinfel chu thil tha ber a nih loh thu a sawi.

Tunhnaia ramri chungchanga buaina leh a kaihhnawih zirchiang tura rawn kal State pawn lam Journalist ten nimin-a a Pisa-a an kawmna ah he thu hi sawiin Home Minister chuan tharum thawhna hmanga buaina chinfel chu thil tha ber a nih loh thu leh thian anga in en a, inrem taka Dawhkan kil-a sawiho chu a pawimawh ber tih a sawi a, rilru tluang tak put tawn chuan State pahnih inkara inremlohna awm hi chinfel theihloh a nih nachhan tur a awm lo tih a sawi. Home Minister chuan boruak ralmuang a awm leh chu an duh ber a ni tih pawh sawiin, kar hmasa Thawhtanni-a State pahnih inkara buaina thleng avanga nunna chan an awm chu pawi a tih thu leh nunna chanta chhungte zawng zawng thinlung taka a tawrhpui thu a sawi a, Mizoram leh Assam lama hliam tuar zawng zawngte tha taka an damchhuah vek theihnan duhsakna a hlan bawk.

Journalist lo kalte hi BBC Columnist, CNN IBN/News18, Federal.com leh ETV Bharat mi leh sa an ni a, niminpiah khan Aizawl lo thlengin ramri lam an pan nghal a, Aizawl an rawn kir hnuah Home Minister-in inhmuhna hun remchang a siam sak hlauh an lawm thu an sawi a. Home Minister pawhin hun harsa tak karah thudik hriat tuma Mizoram an rawn tlawh avang leh buaina chhuahna hmun an tlawh avangin lawmthu a hrilh bawk a ni.