Chanchin thar thenkhat :

/

MP in CMRF-ah vbc. 2 chhung

Mizoram Lok Sabha MP, C. Lalrosanga chuan COVID-19 hri leng dona atana a tul apianga hman turin MP Fund atangin cheng vbc. khat chu nimin khan Chief Minister's Relief Fund for COVID-19 ah a chhunglut a. Lok Sabha MP hi CMRF pe turin Delhi atangin a rawn chho a, Chief Minister hnena Relief Fund a hlan pah hian Chief Minister nen Boundary chungchang, Economic Blockade chungchang leh Myanmar Refugees chungchang te an sawidun nghal bawk a, Zirtawpni khian Delhi-ah a chhuk leh ang. Lok Sabha MP C. Lalrosanga hian nikum khan MP Fund atang vekin cheng nuai 15 chu CMRF-ah a pe tawh bawk a ni.


Health Minister-ah ngen

Lawngtlai District chhung Longpuighat khua a Zonal Young Chakma Association chuan nimin khan Health Minister, Dr. R. Lalthangliana hnenah Longpuighat-a Primary Health Centre (PHC) luah theih a peifel tawh ah Doctor dah thuai tura ngenna an thlen a. Thla hlui ni 13 khan Longpuighat PHC tih puitlin a nih theihna tura hmala tur hian ngenna an lo thlen tawh bawk a ni. Ngenna a an ziah danin, Longpuighat Area-ah hian CADC-a MDC Constituency 10 awmin, sumdawnna kawngah pawha an pankhawm ber a ni a, Long-puighat leh a chhehvel ah hian chhungkaw 6772 awmin, mihring 25,940 vel an awm a, heng mi ten damdawi lam inenkawlna tha an dawn theihna turin Medical Doctor hi a rang thei ang ber a dah turin Health Minister hi an ngen a ni.


Vawk 20,310 zet thi tawh

Nimin khan Mizoram pumah African Swine Fever (ASF) vanga Vawk thi 272 awm lehin heti hian Mizoram-a ASF vanga Vawk thi chu 20,310 a tling ta a. Aizawl District chu Vawk thih tamna ber niin Vawk 8576 a thi tawh a, Vawk thi tlemna ber Siaha District-ah 2 a thi tawh bawk a ni. ASF hi khua leh Veng 222-ah leng mekin nimin khan Vawk 248 suat a ni a, ASF vanga Vawk suat chu 7920 a tling tawh bawk a ni.


Minister bang turin phut

ZPM Thalaite chuan tunhnaia State pahnih buaina avanga mipuite pawhin Assam Chief Minister do-a an beihlet laia Minister, Robert Romawia Royte in Twitter account atanga Assam CM chu a lângsar thei ang bera be tlawna Mizo mipuite zahawmna a lo hralh chu na an tih thu sawiin, ngaihdam dilna siama Minister atanga bang ngam tura an phut thu an sawi.


State 2 aiawh inbe dawn

Assam Chief Minister in a tirha Mizoram rawn kal, Cabinet Minister pahnih, Atul Borah leh Ashok Singhal te leh Mizoram sawrkar aiawhte chu Vawiin hian Aijal Club-ah an inbe dawn nia thudawn a ni a, Mizoram aiawh hian Home Minister Lalchamliana leh Revenue Minister Lalruatkima te an tel dawn a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »