COVID-19 hri kai 885 hmuhchhuah belh leh an ni

Mizoram-ah ni khat-a COVID-19 hri kai hmuhchhuah zat chu ala tlahniam hlei thei lova, niminpiah khan Mizoram-ah Sample 9170 enfiah leh niin heng atang hian hri kai 885 hmuh leh an ni a, Sample enfiah atanga zaa 9.65 te chuan hri an kai a ni.

Niminpiah khan ZMC-a RT-PCR Laboratory-ah Sample 1813 enfiah niin heng atang hian hri kai mi 338 hmuh leh an ni a, an zinga 337 te chu Aizawl District-a Sample lak te niin midang pakhat hi Mamit District atanga Sample lak a ni thung. Aizawl District-a hri kai hmuhchhuah zingah Bawngkawn tam berin 28 an ni a, Rangvamual-ah 21 hmuh an ni bawk. Heng bakah hian hri kai mi 10 leh a aia tam hmuhna 11 zet a awm bawk a, a bak zawng hi Veng leh khua 44 ami an ni thung. Mamit District atanga hri kai hmuh hi Khawrihnim khua ami a ni.

Mizoram-a TrueNat Laboratory 11-ah Sample 319 enfiah ni bawkin heng atang hian hri kai mi 27 hmuhchhuah an ni a, hri kai hmuh zinga mi 10 te chu Lunglei District ami niin Lunglei khawpui chhung ami vek an ni a, Mamit District-ah hri kai mi 8 hmuh niin Siaha District-ah 3, Aizawl leh Lawngtlai District-ah 2 ve ve leh Kolasib leh Siaha District-ah hri kai pakhat ve ve hmuh a ni bawk.

Mizoram hmun hrang hrangah Rapid Antigen Test hmangin Sample 7038 enfiah ni bawkin heng atang hian hri kai mi 520 hmuh an ni bawk a, an zinga 274 te chu Aizawl District-a Sample lak niin Baktawng Chhuanthar Tlangnuam-ah hri kai mi 31 zet hmuh leh an ni a, Venghlui-ah 29 hmuh an ni bawk a, Veng mal-a hri kai 10 aia tam hmuhna Veng 4 a awm bawk a, a bak zawng hi Veng leh khua 54 ami an ni thung. Rapid Antigen Test hmang hian Kolasib District-ah hri kai mi 124 hmuh an ni bawk a, Lunglei District-ah 55, Siaha District-ah 31, Lawngtlai District-ah 25, Mamit District-ah 7, Serchhip District-ah 3 leh Champhai District-ah hri kai mi pakhat hmuh an ni bawk.

Mizoram-ah COVID-19 hrikai hmuhchhuah hi nimin thleng khan 40,995 an tling ta a, nimin khan hri kai mi 430 te chu enkawl dam ni ve lehin nimin tlai dar 5:00 thlengin mi 28,607 enkawl dam an ni tawh a, hei hi hri kai hmuhchhuah atangin zaa 69.78 a ni a, hri kai enkawllai 12,231 an la awm mek a ni.

Hri kai zingah mi pakhat boral awm belh leh :

Nimin zing dar 8:10 khan R. Zakhuma (77), Zemabawk chu COVID-19 vangin ZMC-ah a boral ve leh a, niminpiah-a hri kai tih hmuhchhuah niin nimin khan a boral zui ta a ni. Heti hian nimin thleng khan Mizoram-a hri kai zingah mi 157 zet boral tawhin tun thla ah ni 4 chauh kan la hmanliam chhungin hri kai mi 9 lai an boral tawh bawk a ni.