Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Serchhip - East Lungdar 132kV Line thlun hlawhtling taka enchhinna neih a ni

Serchhip Bukpui atanga East Lungdar-a kawlphetha pekna Line tihchangtlunna tur, 132kV Line chu nimin khan enchhin niin hman chhunzawm mai theih tawh tura ngaih a ni a. He Line hi hman theih tura khawl dang peihfel a nih hunah chuan Khawzawl thlenga kawlphetha pekna leh lakna atan hman tangkai theih a ni dawn a ni.

Bukpui atanga East Lungdar-a 132kV Line enchhinna neih chungchangah hian LENKAWL chuan nimin khan Bukpui Sub-Station hi tlawhin helai hmuna JE, Lalfakzuala leh R. Vanlalfela te chuan an hnathawh dan te an lo hrilhfiah a. P&E Department hotute chuan Serchhip Bukpui atang hian 33kV Line hmangin East Lungdar-ah hian kawlphetha hi pek thin a nih thu leh hei hi tunah hian thuamthain 132kV-a pe thei tura hmalak a ni tih sawiin, nimin-a enchhinna ah hian a tir lamah Keitum khaw bulah line fello deuh awm mah se siamtha nghalin hlawhtling taka enchhin ah an inngaih thu an sawi a. Tunah hian East Lungdar Sub-Station ah Transformers lian chu hman theih tura buaipui mek a ni tih pawh sawiin, hei hi reilote ah peihfel theih an beisei thu leh hei hi hman theih a nih chuan 132kV Line hmang hian East Lungdar-ah hian kawlphetha pek a nih tawh tur thu an sawi a. 132kV Line hmanga kawlphetha hi pek theih a nih chuan he Sub-Station in a chawm te hian Voltage sang zawkin kawlphetha an hmuh theih tawh dawn thu leh hmasawnna pawimawh tak a nih dawn thu an sawi a ni.

P&E Department-a thawktute chuan Zuangtui, Aizawl atangin tunhma chuan Serchhip Bukpui kaltlang hian Mizoram chhimlam zawng te kawlphetha pek thin an nih thu leh Zuangtui atang hian Saitual kaltlangin khawchhaklam te pawhin kawlphetha hi an lak thin thu an sawi a. Zuangtui atanga Mizoram chhim lam kawlphetha pekna tur 132kV Line thar, Melriat kaltlanga Khawiva Sub-Station thleng chu hman a nih tawh thu pawh sawiin, he Line an hman hnuah hi chuan Zuangtui leh Bukpui inkar-a Electric Line chhia a awm pawhin Khawiva Sub-Station kaltlangin Serchip Bukpui hian Power Supply a dawn theih tawh thu leh tunah pawh Zuangtui leh Bukpui inkarah line chhia awm mekin Khawiva lam kaltlang hian Power lakluh mek a nih thu an sawi a ni.

P&E Department hotute chuan tuna an enchhin tak Serchhip Bukpui atanga East Lungdar 132kV Line hi Khawzawl thlenga thlunzawm tura ruahman a nih thu pawh sawiin, tunah hian a Line hrim hrim chu thlun zawh thawkhat a nih tawh thu an sawi a. East Lungdar Sub-Station a Transformer bun te hman theiha peihfel a nih chhungin Khawzawl Sub-Station lam pawh hman mai theiha an peihfel ve a beiseiawm thu pawh sawiin, hei hi hman theih a nih hunah chuan Zuangtui leh Khawzawl inkar-ah 132kV Line chhia a awm pawhin Serchhip atangin East Lungdar kaltlangin 132kV-in kawlphetha hi pekchhawn theih an nih tawh dawn thu an sawi a, Serchhip tan phei chuan kawng pathum (3) hmanga kawlphetha lak theihna a nih dawn avangin a tangkai thei hle dawn tih an sawi bawk.

Comments

Chhiar Hlawhte