College Hostel rawktu man

Hri leng vanga inkharkhip kalpui laia Govt. Serchhip College Boys Hostel rawktu nia hriat chu Serchhip Police ten chhuichhuakin a thil ruk te pawh hmuh let a ni bawk.

COVID-19 hri leng avanga kumin April thla a inkharkhip kalpui a nih hnuah Govt. Serchhip College Hostel-a awm mi 13 te pawh hi an khaw lamah hawin an bung-rua leh thawmhnaw erawh Hostel-ah hian an dah a. Tun thla ni 1-a Hostel enfiah a nih hnuah Hostel hi rawk a ni tih hriatchhuah niin Serchhip Police Station-ah FIR thehluh nghal a ni a, FIR thehluh a nih atanga ni 3 chhungin pawikhawihtu hi Police ten manin a thilruk a lo hralh tawh te pawh hmuhlet leh a ni bawk.

Serchhip Police te hnen atanga thudawn danin College Hostel rawktu hi Lalhruaizela (35), New Serchhip Khawtetlang nia insawi a ni a, Police te hnenah hian Hostel hi a rawk thu sawiin, kumin June thla vel khan Hostel hi a rawk thu a sawi a, a thilruk a lo hralh tawh te pawh nimin khan chhui zui nghal niin Bluetooth Speaker 2, Pressure Cooker 3, Sneaker 2, Gas bur 1, Blanket 1 leh choka bungrua leh thawmhnaw te hmuh let a ni tawh a, an thil hmuhlet hi Rs. 15,000/- hu vel nia chhut a ni. Lalhruaizela hi rukruk thubuai siamsak niin Vawiin lamah Court-ah hruai a ni ang.