Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

COVID-19 hri kai mi 748 hmuh belh leh an ni

Niminpiah khan Mizoram-ah Sample 9223 enfiah leh niin heng atang hian COVID-19 hri kai 748 hmuh leh an ni a, Sample enfiah atanga zaa 8.11 ten hri hi kaiin Mizoram-a COVID-19 hri kai hmuhchhuah chu mi sing li aiin an tam tawh a ni.

Niminpiah khan ZMC-a RT-PCR Laboratory-ah Aizawl leh Serchhip atanga Sample lak 2278 enfiah niin heng atang hian hri kai mi 162 hmuh leh an ni a, hri kai hmuhchhuah te hi Aizawl District atanga Sample lak vek niin hri kai hmuh tamna ber Armed Veng-ah hri kai mi 25 hmuh an ni a, hri kai mi 10 aia tam hmuhna Veng dang pathum awmin midang zawng hi Veng leh khua 31 ami an ni.

District hrang hranga TrueNat Laboratory-ah Sample 483 enfiah ni bawkin heng atang hian hri kai mi 38 hmuh leh an ni bawk a, Siaha District-ah hri kai mi 11 hmuh niin Lawngtlai District-ah 9, Aizawl leh Lunglei District-ah 6 ve ve, Champhai District-ah 5 leh Mamit District-ah hri kai mi pakhat hmuhchhuah an ni.

Rapid Antigen Test hmangin Sample 6462 enfiah ni bawkin heng atang hian COVID-19 hri kai mi 548 hmuh an ni leh bawk a, an zinga mi 299 te chu Aizawl District ami niin Zemabawk North-ah mi 35, Bethlehem Vengthlang-ah 27 leh Muanna Veng-ah 23 te chu hri kai hmuhchhuah tamna an ni. Kolasib District-ah pawh hri kai mi 81 zet hmuh an ni leh bawk a, an zinga mi 65 zet chu Kolasib khawpui chhung ami an ni. Lunglei District-ah pawh hri kai mi 60 hmuh an ni leh bawk a, Champhai District-ah 36, Mamit District-ah 26, Siaha District-ah 24 leh Lawngtlai District-ah 22 hmuh an ni bawk.

Heti hian nimin thlenga Mizoram-a COVID-19 hri kai hmuh tawh chu 40,111 an ni ta a, nimin khan hri kai zinga mi 403 te chu enkawl dam ni lehin nimin tlai dar 5:00 thlenga Mizoram-a hrik ai enkawl dam chu 28,045 an ni tawh a, hei hi hri kai hmuhchhuah atanga chhutin za a 69.923 a ni a, tunah hian hri kai enkawllai 11,911 an la awm mek a ni.

COVID-19 hri kai mi 156 zet an boral tawh

Mizoram-a COVID-19 hri kai zingah boral awm belh zelin nizan thleng khan mi 158 an boral tawh. Nimin zing dar 1:00 khan Vanlalhriati (40), Serchhip P&E Veng chu ZMC-ah boralin July 19 khan Aizawl-a damdawi In-a inentir tura a kal chu hri a kai tih hmuhchhuah niin Aizawl District-a case-a ziahluh a ni. Hemi hnu nimin zing dar 2:50 khan Vanlalringa (67), Vairengte IOC Veng chu DCHC Kolasib-ah COVID-19 vanga boralin  Rita Thanseii (82), Sairang Dawr Veng chu nimin zing dar 7:40 khan Sairang DCHC-ah a boral leh a. R.Thangzova (80) Govt Complex Aizawl pawh nimin zing dar 9:25 khan ZMC-ah boral lehin nizan dar 6:05 khan Lalliankimi (39), Siaha chu ZMC-ah a boral ve leh bawk a ni.

Comments

Chhiar Hlawhte