Branch YMA in Kuang thawh

Khualkhua atanga Serchhip District Hospital-a damlo boral te ruang thawnchhuahna turin Serchhip Sub-Hqrs. huamchhunga YMA Branch ten tunlai hian Kuang an thawhkhawm leh mek.

COVID-19 hri leng avanga Serchhip District Hospital-a boral, khawdang-a ruang thawn tur te mimal In-ah te lak a remchan loh thin avangin nikum atang khan Serchhip Sub-Hqrs. YMA chuan Serchhip District Hospital atanga ruang thawnchhuahna tur hian an huamchhunga YMA Branch te chu a remchan anga Kuang dah tur hian a rel a. Nikum lama Kuang dah te hman zawh a nih dawn hnaih tak avangin tunhnaia SEC thukhawm chuan Branch hrang hrangte chu an remchan anga Kuang hi dah leh tura tiin tunlai hian Branch hrang hrang ten kuang an dah leh mek a. Hemi ang hian Chhekhnai Branch YMA, Serchhip Vengchung Branch YMA leh Hriangtlang Branch YMA te chuan tunhnaiah Kuang hi an dah leh tawh a ni.

Heng YMA Branch te Kuang dah hi a mamawh apiang ten a thlawnin an hmang thin a, tun dinhmun ah Puitling Kuang 4 leh Naupang Kuang 5 te chu a mamawh apiangte hman mai turin a awm mek a ni.