Health Minister in rampawn atanga Media lo kal te thudik hailanna atana hmang thiam turin a chah

Health Minister Dr. R. Lalthangliana chuan nimin khan Kolasib, Vairengte leh Kanhmun khua te tlawhin hri leng dona kawnga hmalakna hrang hrangte a enpui a. Ramri buaina avanga State pawn atanga thuthar lakhawmtu engemaw zat lo kalte chu thudik hailanna kawng a hmanraw tangkai tak a hmang thiam turin a chah bawk.

Health Minister hian Kolasib tlawh hmasa berin District Level Task Force-te nen Circuit House-ah inkawmna an nei a, he hunah hian Minister chuan Kolasib District chu Mizoram hmel lanna District pawimawh tak a nih angin Kolasib District chhunga Sawrkara mawhphurna chelhtute leh tlawmngai pawl hrang hrangte an pawimawh zia a sawi a, hrileng dona kawnga an thawhhlawk zia tarlangin, an inpekna hrang hrangah lawmthu a sawi bawk.

Kolasib-a District Hospital sak that dan tur pawh a hmunah en nghalin Health Minister chuan Kolasib District Hospital chu changtlung zawka thawmthat tum a nih thu leh District Hospital tan 80 LPM, NESIDS atangin leh 250 LPM, PM Cares atangin Oxygen Plant khawl bun turin hma chak tak a lak tum a nih thu a sawi bawk. District Hospital Kolasib hi khum 100 lenna Hospital tura thawmthat nan North East Special Infrastructure Development Scheme atangin cheng vbc. 22 ruahman a ni a, hna tan tur hian a tul anga hmalak thuai tum a ni.

Hemi hnu hian Vairengte tlawh nghalin Vairengte khawtlang hruaitute nen an inkawmna ah Health Minister chuan ramri-a duty Mizoram Police-te hriselna endik turin Medical Operation Team-te chu nimin khan an kalchhuah tur thu a sawi a, “Ramri hrul a duty Mizoram Police-te leh khawtlang hruaitu, Duty-te tawiawm a chechhuakte chu hri kai an inringhleh a nih chuan a thlawn a endik sak an ni ang,” a ti a. Ramri-a buaina thleng avanga State pawn atanga thuthar lakhawmtu engemaw zat lo kalte chu thu dik hailanna kawng a hmanraw tangkai tak a hmang thiam turin khawtlang hruaitute a chah a, Assam lama kawng dan a nih avanga damlo enkawlna kawnga harsatna awmte leh COVID-19 hri dona kawnga Mizoram Sawrkar hmalakna chungchangah State pawn atanga lo kal thutharlakhawmtute chu inkawmna hun a neihpui nghal bawk a ni.

Commerce & Industries Department changtu Minister ni bawk Dr. R. Lalthangliana hian Kanhmun khua-a COVID-19 Screening Point leh ramri-a Duty sipaite pawh tlawh nghalin Kanhmun khua chu ramri-a awm an nih avangin thenawm State-te nena inkalpawh reng an ni a, hri lakah pawh an fimkhur a tul thu a sawi a, kan thenawm State atanga rawn lutte'n COVID-19 an vei leh veiloh endikna hmun, Screening Point a thawktute chu taihmak chhuah zel turin a chah bawk.

Kanhmun Screening Point hi nikum July atang khan mumal taka kalpui niin, mi 14,450 Screening neih tawh a ni a, mi 12,122 te Rapid Antige Test neih tawh niin hri kai 91 hmuh an ni tawh a ni.

Dr. R. Lalthangliana hian Assam leh Mizo-ram inrina Medili Lei tlawhin tunhnaia Assam lam nena boruak duhawmlo thleng chu pawi a tih thu sawiin, ramri-a duty kan sipaite chu kan ram leh hnam chhan nana hma an lakna leh an thawhrimna chu fakawm a tih thu a sawi a, rilru paukhuah tak pu a, kan ram leh hnam tana thawk zel tura chahin, kan rilru in a ngam na na ah chuan hnehna kan chan thin avangin ram mipuite'n thinlung taka kan thlawpna hre renga phur taka ram venhim hna thawk zel turin a chah bawk.

Minister chuan Mizoram leh Assam inrina Medili Lei lehlam-a Assam in kawng an block chu tha a tih loh thu sawiin, National Highway dan chah hrim hrim chu dan phalloh a nih thu a sawi a. Assam nena buaina awm mek chungchang pawh Sawrkar laipui lamah thlen zel a nih thu a sawi bawk.