Latest News

Chanchin thar thenkhat :

Union Home Minister kawm

Mizoram Governor Dr. Haribabu Kam-bhampati chuan niminpiah chawhnu khan Union Home Minister, Amit Shah chu Parliament House, New Delhi-ah a kawm a, Governor chuan tunlaia Mizoram dinhmun, ramri buaina chungchang leh Mizoram tan a thil pawimawh te a thlen a. Governor thil thlen te hi Union Home Amit Shah chuan lo ngaihthlak sakin, ramri buaina chung-changah pawh inremna a awm thuai theih nan thil tih ngai apiang te tih a ni a, uluk takin hmalak mek a ni tih a sawi. Governor chuan boruak tha tak hnuaiah ramri-a buaina te chinfel a nih theih nan State pahnih-a mipuite pawh harsatna siam lo turin a ngen a. Remna lam hawi zawnga rilru put hmang siam a, hmalak tlan a pawimawh tih sawiin, boruak tichhe zawnga hma la lo tur leh thu-chhuah te siam lo turin mitinte a ngen bawk.


MBA in HC-ah PIL an thehlut

Mizoram Bar Association (MBA) chuan Mizoram-a nitin mamawh chawkluhna kawngpui Assam-in an dan chungchangah nimin khan Gauhati High Court, Aizawl Bench-ah PIL an thehlut. MBA chuan NH-306 dan chungchanga hma la rang tura ngenna an thehluh chuan awmzia a neihloh avangin Mizoram mipuite hmakhaw ngaia Court a zualko mai chu tun dinhmunah a tha ber nia an hriat avanga PIL thehlut an ni tih an sawi. MBA hian nikum lama NH-306 dan pin chungchangah pawh PIL lo file tawhin, kawng dan tihtawp a nih hnuah PIL pawh hi tihtawp ve a nih thu an sawi bawk.


Bungrua lalut turin ngen

Mara Thytlia Py chuan nimin khan Siaha a nitin mamawh (essential commodities) zuar Non-Tribal Traders te ko khawmin tunhnaia buaina avanga Siaha District-a ei leh bara harsatna a awmlohna tura hmalak dan tur an sawipui a. Non-Tribal Traders te chu kar hnih hun chhungin essential commodities te Tripura State lam atangin lalut tura ngenin, huntiam chhunga bungrua lalut thei lo dawrkai te chu an chungthu rel nise an ti bawk.


Dawt a nih thu YMA in sawi

Central YMA chuan Assam Minister, Ashok Singhal-a’n August 2, 2021-a NE Live TV Channel-a National Highway-306 Mizoram chak lakna kawngpui dan pin a nih loh thu a sawi chu dawt hmanga hmaiphih tumna ah an ngai tih an sawi a. NH. 306 hi nimin thleng khan danpin ala nih thu leh lirthei tangkhang zingah hripui leng mek enkawlna tur damdawi leh hmanrua a tel thu an sawi bawk.

Comments

Chhiar Hlawhte