Latest News

Serchhip bialtu MLA in Thenzawl CHC-a hman turin MLA Fund atangin Ambulance a hlan

Serchhip bialtu MLA, Lalduhoma chuan a bial chhung Thenzawl CHC-a damlo a mamawh apiangte hman turin nimin, August 3, 2021 khan Ambulance a hlan.

Thenzawl CHC tana Ambulance hlanna puala inkhawm Vantawng Group YMA Run, Thenzawl Bazar Veng-a neih ah bialtu MLA, Lalduhoma chuan Thenzawl CHC-a Medical Officer, Dr. Remlalnghaki hnenah Ambulance Chabi hi a hlan a, he hun hi Thenzawl Town Task Force Committee Chairman, Lalropuia Sailo chuan kaihruaiin Thenzawl SDO (C), Amol Srivastava leh damdawi In thuneitute bakah khawtlang hruaitu thenkhat te an tel a, Thenzawl khawtlang hruaitute chuan bialtu MLA in an mamawh em em Ambulance a pe chu an lawm hle tih an sawi a ni.

Ambulance hlanna puala inkhawm ah hian Serchhip bialtu MLA, Lalduhoma chuan Mizoram in hripui pahnih, COVID-19 leh Vawk pul hri, African Swine Fever (ASF) vangin harsatna nasa tak kan tawk mek tih sawiin, hripui leng vanga sum harsatna avangin nikum lamah MLA Fund cheng nuai 40 an dawng kimlo tih a sawi a. Kumin ah pawh MLA Fund 1st Instalment-ah a zatve chauh pek an ni rih tih sawiin, ram sum dinhmun thlirin tun bak hi sawrkar in a pe chhunzawm tawhlo mai ang tih hlauhna an nei lian hle tih a sawi a. Sawrkar in a kalphung pangngai-a an dawn tur zat a sanction thei hlauh a nih chuan MLA Fund hmanga nasa zawka hma an lak theih a beisei thu sawiin, MLA Fund dilna pending an neih mek te, dil tawh te leh dil tum te pawhin an harsatna hriatpui se an duh thu leh a theih anga hmalak zel an tum thu a sawi a. Hripui vanga sum harsatna avanga an tih theihloh te an hriat reng thu leh kumthar-ah boruak tha hnuaiah a pangngaia kal chho tura beiseina an neih thu a sawi bawk.

Serchhip bialtu MLA chuan hripui leng karah mipui mamawhna a san avangin MLA Fund atangin a theih ang angin Ambulance leina tur hi ngaihtuah a nih thu leh mipui, a mamawh apiang ten inthlahrung lova an hman tlan theih tura pek a ni tih sawiin, a mamawh apiang ten a thlawn em a nih loh pawha zangkhai deuh zawka an hman theih tura ruahmanna siam thiam turin Thenzawl CHC hotute chu a chah a. Amah thlangtlingtute chauh MLA a nih loh thu sawiin, Bial mipui zawng zawng MLA a nih thu leh tumah enhran a tum loh thu te, VC leh NGO te nen thawhhona tha tak neih a duh thu leh amah be duh leh mamawh nei chuan Phone hmang pawha be thin turin a chah bawk.

Serchhip bialtu MLA in nimin-a Thenzawl CHC-a Ambulance a hlan hi Eeco Van niin Registration tihfel ala ni lova. Thenzawl CHC-a Medical Officer chuan Ambulance hi nei mah se a chhiat avangin a siamthatna tur an dil mek tih a sawi a, Driver pawh an neih sa thu sawiin, damlo phurhna atana hman theih tura la buatsaih leh a tul dawn nia thudawn a ni bawk.

Comments

Chhiar Hlawhte