Indirect-a sawrkar hnathawk vauna niin sawi

Sawrkar hnathawk COVID-19 dona atana pawisa thawh ve remchang lo tura in report tura tih chu sawrkar hnathawkte indirect-a vauna, sawrkar tanpui nana mahni hlawh thawh remchang theilo te chhinchhiah tumna a nih thu Congress Party chuan an sawi.

Nimin-a thuchhuah an siamah Mizoram Pradesh Congress Committee (MPCC) chuan Mizoram sawrkar ngenna anga sawrkar hnathawk ten COVID-19 dona atana an ni khat hlawh an thawh tur chu buaipui mek a nih thu leh Sawrkar hnathawkte zinga pawisa thawh ve remchanglo turte chu an Department theuh a Drawing & Disbursing Officer (DDO) hnenah in report tura tih an ni tih sawiin, he thil hi sawrkar hnathawkte indirect-a vauna, sawrkar tanpui nana mahni hlawh thawh remchang theilo te chhinchhiah tumna a ni tih an sawi a. “MNF sawrkar pawisak neih loh dan enin Sawrkar hnathawk tam tak, harsa taka khawsa ve tawk tawk te leh, ni khat hlawh thawh ve remchanglo te, thawh kher ngai ti lo te pawh sawrkar hlauh vangin an in report ngam dawn lo tih a chiang hle a ni,” an ti.

Congress Party chuan tukluih Donation ang zia zanga sawrkar hnathawk te an ni khat hlawh thawh tir tumna chu tha an tihloh thu leh, pawisa thawh ve theilo te in report tura tihna chu tidanglam leh thuai tura sawrkar an phut thu an sawi bawk.