Mizoram-ah COVID-19 hri kai 9000 aiin an tam tawh

Mizoram-ah ni khat-a COVID-19 hri kai hmuhchhuah zat ala tlahniam hlei thei lova, niminpiah khan Mizoram-ah Sample 3666 enfiah leh niin heng atang hian hri kai 239 hmuhchhuah leh an ni a, Mizoram-a hri kai hmuhchhuah pawh sang kua aiin an tam tawh a ni.

Niminpiah khan ZMC Laboratory-ah Sample 1077 enfiah niin heng atang hian hri kai mi 35 hmuhchhuah an ni a, an vai hian Aizawl District-a sample lak vek niin hri kai hmuhchhuah tawh nen inkawmhna nei leh inkhunghrang lai vek an ni. Niminpiah khan District hrang hranga TrueNat Laboratory-ah Sample 216 enfiah niin heng atang hian hri kai 5 hmuhchhuah an ni bawk a, an zinga mi 3 chu Champhai District-a hmuh niin hri kai tawh nen inkawmhnaihna nei an ni a, Lunglei District-ah hri kai pahnih hmuh niin State pawn atanga rawn haw, inkhunghrang lai an ni bawk.

Rapid Antigen Test hmangin niminpiah khan Mizoram-ah Sample 2373 niin hri kai 199 hmuhchhuah an ni a, an zinga 179 te hi Aizawl District-a hri kai hmuhchhuah an ni a, Aizawl Electric Veng-ah hri kai mi 24 hmuh niin Ramthar-ah 19 leh Maubawk, Tuithiang leh Falkland-ah 11 hmuh an ni bawk a, Aizawl-a hri kai hmuhchhuah zinga 83 te hi hri kaina hriatloh leh chhuizui ngai an ni. Heng bakah hian Serchhip District-ah hri kai mi 7 hmuh niin Mamit District-ah 4, Lunglei District-ah 3 leh Kolasib, Lawngtlai leh Siatual District-ah pahnih theuh hmuhchhuah an ni bawk.

Nimin khan Mizoram-ah COVID-19 hri kai mi 162 zet enkawl dam leh an ni bawk a, heti hian nizan dar 8:30 thlenga Mizoram-a hri kai hmuhchhuah chu 9068 niin heng zinga 7094 te chu enkawl dam an ni tawh a, hei hi hri kai hmuhchhuah atangin zaa 78.23 niin tunah hian hri kai enkawllai 1945 an awm mek a ni.

Hri kai zinga nunna chan mi 2 awm leh :

Mizoram-a COVID-19 hri kai enkawl zingah nimin khan nunna chan mi pahnih an awm leh. Sawrkar thuchhuah in a tarlan danin nimin zing dar 1:30 vel khan C. Lalthanzami (67), Tanhril chu COVID-19 Pneumonia vangin ZMC-ah a boral ve leh a, C. Lalthanzami hian April 16 khan COVID-19 hri a kai tih hmuhchhuah niin a tuk April 17 atangin ZMC-ah dahluh a ni a, amah hi Zunthlum nei a ni bawk. Nimin chawhma dar 11:50 khan C. Lalzuia (63), Dinthar Veng Aizawl chu COVID-19 Pneumonia vangin a boral ve leh bawk a, tun thla ni 7 khan hri a kai tih hmuh-chhuah niin amah hi Zunthlun nei a ni a, hri a kai tih hmuhchhuah a nih hnu hian ZMC-aICU-ah dahluh nghal niin nimin khan a boral zui ta a ni.

Heti hian nimin tlai dar 5:00 thleng khan Mizoram-a hri kai hmuh tawh zingah nunna chan mi 29 an awm ta a ni.