ZMC tana School ram pek pawi tih thu an sawi

MZP chuan Muallungthu Village Council ten Zoram Medical College Extension atana Govt. Primary School leh Govt. Middle School building leh ram Health & Family Welfare Department hnena an pe ringawt mai hi mak an tih thu leh hriatthiam har an tih thu an sawi.

Nimin-a thuchhuah an siamah MZP General Hqrs. chuan zirna hmun leh ram te Muallungthu VC ten Education Department thuneitute vawikhatmah pawh sawipui lova an pe mai chu an hrethiam lo takzet tih sawiin, School Education Director in May 15-a Muallungthu VC te insawifiah tura a tih ang ngeia insawifiah tur leh he ram hi School Education Department kuta hlanlet leh vat tura an phut thu an sawi a. MZP chuan zirna tha kan neih nan leh School ram humhim a nih theih nan theihtawp a chhuah zel dawn tih an sawi bawk.

Mizo Students’ Union (MSU) General Hqrs. pawhin hetianga School ram ZMC tana pek hi nimin khan a hmunah kalin an endik tih an sawi a, Muallungthu khua ah hian P/S pahnih awmin khawchhung-a awm zawk hi zirlai awmloh avanga rauhsan a nih thu leh, tuna zirlaite kal mekna zawk chu Falkawn khua nena an inrina hnaiah a awm a ni tih sawiin, tunlai kan ram hrileng nena zirna In hawn theih a nihloh laia VC ten ram an lo pe mai nia lang chu pawi an tih thu an sawi bawk.