Thingtiak phun chhun enkawl chhunzawm lam ngaih pawimawh a tul - EF&CC Minister

State Level Sub-Committee in Green Mizoram chu nimin khan thukhawmin he hunah hian Forest Minister, TJ. Lalnuntluanga chuan thingtiak phun tam aia phun chhun apiang hlawhtling tura enkawl chhunzawm lam ngaih pawimawh a tul thu a sawi.

State Level Sub-Committee On Green Mizoram thutkhawm hi nimin khan an Chairman leh Environment, Forests & Climate Change Minister ni bawk, TJ. Lalnuntluanga kaihhruaiin PCCF Conference Hall, Tuikhuahtlang-ah biak hmuh theihna kaltlanga neih a ni a, he hunah hian Minister chuan thing phun chu hunbi nei a nih avang leh khawtlai chi a nih loh avang te, kan tuihna kiam zel leh sik leh sa inthlakthleng nasa avang leh kumin-ah kum dang aia khawkheng kan tawrh rei avanga kangmei nasa tak chhuak avangin thingphun chu ngaihpawimawh a tul tih a sawi a, EF&CC Department chuan kum hmasa lam atang khan thingtiak lian tha leh hrisel tak nei turin hma a lak thu sawiin, Green Mizoram Day-a phun tur ‘tall seedlings’ a bik taka ruahman a nih thu a sawi bawk.

Forest Minister chuan phun tam aia phun chhun apiang hlawhtling tura enkawl chhunzawm lam ngaih pawimawh a tul thu pawh sawiin, kumin ah kumdang aiin ruahtui kan hmu har a, kangmei pawh a chhuak nasa hle a, kumin-a kangmei chhuakah hian Forest Field Staff ten kangmei thelhna kawngah theihtawp an chhuah thu sawiin, khawtlang mipuite leh NGO te nen thawhhona tha tak a neih avangin lawmthu a sawi bawk.

Nikum (2020) khan COVID-19 hripui avangin Green Mizoram Day hi kumdang anga hman theih a ni lova, kumin 2021-ah pawh hian COVID-19 hripui chuan ziawm lam a pan theih loh avangin, Sawrkar-in COVID-19 darh tur a venna kawnga inkaihruaina a siamte bawhchhe lovin, District Level Green Mizoram Committee ten anmahni District theuh ah ruahmanna siam se tiin a rel a ni.

Mizoram sawrkar hmalakna in Green Mizoram Day hi kumtin June 11-ah hman thin a ni a, State Level Sub-Committee on Green Mizoram rawtna siam te hi State Level Committee on Green Mizoram-ah thlenin hemi ang hian Mizoram District hrang hrangah te pawh hman a ni dawn a ni.