Chanchin thar thenkhat :

4C tan MSHCS hman ve duh

Aizawl Municipal Corporation (AMC)-a Councillor, Christina Roluahpuii Sailo chuan nimin khan Health Minister, Dr. R. Lalthangliana hnenah Community Covid Care Centre (CCCC) a enkawl mek ten Mizoram State Health Care Society (MSHCS) a an inenkawlna senso an bill let ve theih nana ngenna a thlen a. May 6, 2021 a Health Minister hova Meeting chuan sawrkar in inenkawlna tur a buatsaih hmuna enkawlte chu MSHCS hnuaiah an inziaklut a nih chuan, he Scheme hnuaiah hian inenkawlna senso cheng nuai 2 thlengin an bill thei tih an lo tarlang tawh a. Sawrkar enkawl ni lo, vantlang enkawl, senso sang leh hautawk zawkna hmun, Community Covid Care Centre-a awm te erawh chuan an inenkawlna an bill let theih loh avangin ngenna hi a thlen ta a ni.

Health Minister Dr. R. Lalthangliana hian nimin-a Meeting an neih ah Mizoram State Health Care Scheme hnuaia inziaklut te chuan COVID-19 hri an kaiin an inenkawlna senso cheng nuai 2 thleng an bill thei tih sawiin, hei hian DCH, DCHC, CCC leh CCCC te a huam thu a sawi bawk.

Health Minister in sem

South Tuipui bialtu MLA leh Health Minister ni bawk, Dr.R.Lalthangliana chuan nimin khan a bial chhunga VLTF hrang hrang 22 te hnenah Face Mask, Sanitizer leh Glove thahnem tak a hlan bakah Thingsai, Cherhlun leh S.Vanlaiphai PHC-te tan Rs.10,000 theuh a hlan a. Heng hmanrua leh pawisa te hi Minister chuan a aiawh tirin nimin khan Hnahthial-ah phurh a nih hnuah Hnahthial-a District Hospital kawt tual-ah pek-chhuah a ni. Health Minister chuan COVID-19 vanga South Tuipui bial mipuite thawhrimna chu lawmawm a tih thu sawiin, VLTF leh bial mipuite chu theihtawp chhuah zela fimkhurna tlachham lo turin a chah a. Lockdown avanga chhuan-chham leh harsa zual an awm anih chuan VLTF kaltlangin inthlahrung lova an hrilh hriat zel a beisei thu a sawi bawk.

By-pass duhlohna lantir zel

Kawlkulh leh Dulte Joint NGO Coordination Committee ruahman angin NH. 6 by-pass Road siam duhlohna lantir nan nimin khan by-pass intanna tur hmun nia sawi, KM 54.40-ah pal pin hnatlang an nei a, he hunah hian mi 200 vel thawkin bialtu MLA, L. Thangmawia chuan a tlawh bawk a ni.

MOT ten CCC an tlawh

Medical Operational Team (MOT) chuan nimin khan an Chairman, Dr. ZR. Thiamsanga MLA hovin Aizawl khawpui-a Covid Care Centre (CCC) 4 te bakah Lengpui Airport Screening Point te tlawhin an dinhmun leh harsatna te an enpui a ni.