Ni khat-a COVID-19 kai hmuh tam ber ni thleng leh

Niminpiah-a Mizoram-a Sample enfiah 3871 atangin COVID-19 hri kai 240 zet hmuhchhuah leh niin darkar 24 chhunga Mizoram-a hri kai hmuhchhuah tam ber ni a ni leh a, Mizoram-a hri kai hmuhchhuah pawh mi sang riat aiin an tam ta a ni.

Niminpiah khan ZMC Laboratory-ah Sample 1638 enfiah leh niin heng atang hian COVID-19 hri kai mi 131 zet hmuhchhuah an ni a, an vai hian Aizawl District-a Sample lak vek niin an zinga mi 44 te chu Assam Rifles mi leh sa, tunhnaia State pawn atanga rawn lut leh inkhunghranna hmuna awmlai an ni a, BSF Sipai State pawn atanga rawn lut mi 7 leh BRTF mi leh sa pakhat te an tel bawk a, midang te hi hri kai nen inkawmhnaihna nei leh tunhnaia State pawn atanga rawn lut te ni hlawmin COVID-Free Certificate neih duh avanga Sample enfiah mi 2 an awm bawk a ni.

Niminpiah vek khan District hrang hranga TrueNat Laboratory-ah Sample 158 enfiah niin hri kai 9 hmuhchhuah an ni bawk a, Kolasib District-ah mi 4, Saitual District-ah mi 3 leh Lunglei leh Khaw-zawl District-ah mi pakhat ve ve an ni a, an zinga mi 8 te chu hri kai nen inkawmhnaihna nei niin midang pakhat hi State pawn atanga rawn lut, inkhunghrang lai a ni bawk.

Niminpiah khan Rapid Antigen Test hmangin Sample 1961 enfiah niin hri kai mi 100 hmuh an ni bawk a, an zinga mi 52 te hi Aizawl District ami niin Serchhip District-ah mi 20, Kolasib District-ah mi 10, Lunglei District-ah mi 9, Siaha District-ah mi 8 leh Lawngtlai District-ah mi pakhat te an ni.

Nimin khan Mizoram-a COVID-19 hri kai mi 118 te chu hri lakah fihlimin anmahni enkawlna hmun atanga chhuahtir an ni ve leh a, heti hian nimin tlai dar 5:00 thlenga Mizoram-a hri kai hmuh tawh chu 8032 niin an zinga 6120 te chu enkawl dam an ni tawh a, hei hi hri kai hmuh tawh atanga chhutin za zela 76.20 a ni a, tunah hian hri kai enkawllai 1889 la awmin hri kai zingah nunna chan 23 an awm tawh bawk a ni.

Ramchhung ah hri kai hmuh zat tlahniam hret hret :

Ramchhungah COVID-19 hri vei mek zat a tlahniam hret hret a, State leh UT thenkhatah erawh chuan hri kai hmuhchhuah zat a la sang hle. Union Health Ministry chuan hri vei enkawl mek hi hri kai hmuh tawh atanga zaa 15.86 anih thu sawiin, tunah hian hri vei enkawl mek hi nuai 37 chuang rampumah an la awm thu a sawi. Tunhnaiah nikhat ah nuai thum chuang hri vei enkawl dam an awm chhoh reng avangin hri vei enkawl dam zat pawh zaa 83.04-ah a kai chho a, darkar 24 kalta chhung khan hri vei 3,55,338 te enkawl dam niin nimin thleng khan mi 1,93,82,642 te enkawl dam an ni tawh a ni.