Chanchin thar thenkhat :

Lab. Technician la turin ngen

Mizoram Government Medical Laboratory Technician Association chuan tunhnaia Covid hrik enna hmunpui, Zoram Medical College (ZMC)-a Viral Research & Diagnostic Laboratory (VRDL) a Lab. Technician duty ten CO-VID-19 hri an lo kai leh hemi avanga COVID sample test a khaihlak ta hial chu pawi an tih thu an sawi a. Laboratory Technician, Zoram hmun hrang hranga hah taka Covid hrik zawn hna (dignosis) thawktu zawng zawngte zam mai lova Mizoram mipuite chhanhim nana theihtawp chhuah zel turin an ngen a. A tulna apianga an-mahni tanpuia thawhpui zel turin an inpeih reng tih an sawi bawk. Mizoram-ah Lab. Technician regular mi 50 vel chauh an la awm thu pawh sawiin, an indaihlohna te hriatthiam puiin sawrkar in a tam thei ang ber Lab. Technician regular/contract la thuai turin an ngen bawk.

Zanriah buatsaih sak

Sports Minister Robert Romawia Royte chuan Mizoram pawn, State danga Election duty a kal Police lo hawte zinga COVID-19 hri leng avanga Rengdil, Thenzawl, Khawzawl, Lunglei leh Serchhip Covid Care Centre leh Covid Quarantine Centre a awm mek mi 200 dawn te tan nimin khan an Commandant theuhte kal tlangin zanriah a buatsaih sak a, hun harsa tak karah huaisen leh tlawmngai taka State danga an duty tha taka an hlenchhuak chu chhuanawm a tih thu leh an mawhphurhna an hlen chhuahna lamah vanduai-thlak taka Covid hripui an rawn vei haw chu pawi a tih thu a sawi a. Dam chhuak thuai tur leh, Mizoram-a COVID hripui darh zel tur ven-himna kawnga a hmatawng-a ding leh thei thuai turin duhsakna a hlan bawk.

ZMC-a enkawl turin hruai

Niminpiah-a COVID-19 hri kai hmuhchhuah P&E Minister, R. Lalzirliana te chhungkua, a nupui leh a fapa te chu In lama enkawl an nih hnuah taksa lama insawiselna dang an neih avangin nimin khan ZMC-a enkawl turin hruai an ni.

Bawlhhlawh lak dan enpui

Aizawl Municipal Corporation (AMC)-a Executive Councillor i/c Solid Waste Management, Laltlanzova Khiangte chuan nimin khan SAI Hostel, Mission Vengthlang-a Covid Care Centre (CCC) chu tlawhin bawlhhlawh an lakkhawm dan te a hmunah a enpui a, heng hri kai enkawlna hmun a bawlhhlawh te chu bawlhhlawh atanga hri inkaichhawn a nih lohna turin bawlhhlawh sawngbawl dan tur inkaihhruaina, SOP chu tha taka zawm a tul thu a sawi bawk.

Gas sem leh tawh dawn

Mizoram Indane Distributor Association (MIDA) chuan tun thla ni 5-a an Committee in COVID-19 hlauh vang leh a kaidarhtu nih hlauh avanga dawr khar-a pawn lama Gas sem te chawlhsan tura a tih chu nimin khan an thiat tih an sawi a. Nimin-a an pawl Committee in an rel angin nimin atang khan Mizoram-a LPG Distributir zawng zawng ten dawr te hawngin pawn lamah Gas pawh sem chhunzawm leh tawh tur a nih thu an sawi bawk.

Hri danna pe chhunzawm zel

Nimin thleng khan Mizoram-ah mi 2,30,103 te chu COVID-19 Vaccine, Covishield Dose 1-na pek an ni tawh a, heng zinga mi 51,445 te chu Dose 2-na pek ni tawh bawkin nimin bikah mi 1390 te hnenah Dose 1-na pek a ni a, mi 185 te hnenah Dose 2-na pek an ni bawk. Ser-chhip District-ah chuan nimin khan Frontline Worker mi pakhat chu Dose 1-na pe in mi 6 hnenah Dose 2-na pek a ni a, kum 45 chunglam mi 14 hnenah Dose 1-na pe in Dose 2-na pawh mi pakhat hnenah pek a ni bawk.